Siyasi Məhbusların Monitorinqi Mərkəzi Gözəl Bayramlının azadlığa buraxılmasını tələb edir

Bakı/27.05.17/Turan: Siyasi Məhbusların Monitorinqi Mərkəzi (SMMM) Azərbaycan Xalq Cəbhəsi Partiyası sədrinin müavini Gözəl Bayramlının həbsini qəti şəkildə pisləyib və onun dərhal azadlığa buraxılmasını tələb edib.

SMMM-in bəyanatında deyilir ki, G.Bayramlının mayın 25-də Gürcüstandan gələrkən Qazax rayonunda sərhəd-nəzarət məntəqəsində saxlanması Avropa İnsan Hüquqları Konvensiyasının hüquq normalarına əməl olunmadan baş verib.

Saxlanılan şəxsə vəkillə əlaqə yaratmaq imkanı verilməyib. Onun mobil telefonu əlindən alınıb. Bundan əlavə, ittihama sübut kimi videoçəkiliş təqdim olunmayıb.

SMMM-in rəhbəri Elşən Həsənov bildirib ki, bununla da G.Bayramlının barəsində Avropa konvensiyasının "azadlıq və şəxsi toxunulmazlıq hüququ", özünü şəxsən və ya seçdiyin müdafiəçi vasitəsilə müdafiə etmək" hüququnu nəzərdə tutan 5-ci maddəsu pozulub.

"Gözəl Bayramlı AXCP fəalıdır. Korrupsiyaya bulaşmış məmurların barəsində tənqidi məqalələr yazıb. Son vaxtlar bir neçə dəfə daxili işlər orqanlarına və prokurorluğa çağırılıb. Biz hesab edirik ki, onun həbsi siyasi fəaliyyətilə bağlıdır",- E.Həsənov vurğulayıb.

O qeyd edib ki, son vaxtlar müxalifətyönlü Xalq Cəbhəsi Partiyası sistematik olaraq hakimiyyətin təzyiqi altındadır. Siyasi məhbuslar siyahısında 8 nəfər AXCP üzvü, o cümlədən Seymur Həzi, Asif Yusifli, Məmməd İbrahim, Fuad Qəhrəmanlı, Fuad Əhmədli, Faiq Əmirov, Elnur Fərəcov və Murad Adilov var.

"Məhkəmə sisteminin hakimiyyətdən asılı olduğunu nəzərə alaraq, biz ədalətli məhkəməyə şübhə edirik və Gözəl Bayramlının dərhal azadlığa buraxılmasını tələb edirik",- E.Həsənov bildirib.

Mayın 27-nə kecən gecə Səbayel Rayon Məhkəməsi G.Bayramlının barəsində üç ay müddətinə həbs qətimkan tədbiri seçib. O,CM-in 206.1 maddəsi (qaçaqmalçılıq) ilə ittiham olunub. G.Bayramlını 5 ilədək azadlıqdan məhrumolunma təhlükəsi gözləyir.

* Gözəl Bayramlı ittihamı rədd edərək işin siyasi xarakter daşıdığını bildirib.

** SMMM 2014-cü ildə bir qrup keçmiş "vicdan məhbusu" tərəfindən yaradılıb.-06D--