Siyasi məhbusun anası oğluna işgəncələrin verildiyini bildirir

Bakı/11.05.18/Turan: "Müsəlman Birliyi" Hərəkatı rəhbərinin müavini, Qobustan həbsxanasında saxlanılan Abbas Hüseynovun anası ona işgəncələrin verildiyini bildirib.

Rəhimə Hüseynovanın sözlərinə görə, oğlu bu barədə mayın 10-da həbsxanadan evə zəng edərək bildirib.

Ana deyib ki, son iki gündür Abbası dəmir dirəyə bağlayırlar, bütün günü günəşin altında saxlayırlar. "Bu gün həmişə olduğundan gec zəng elədi və dedi ki, onu bağladıqları dirəkdən indi açıblar", - R.Hüseynova Turan-ın müxbiri ilə söhbətində bildirib.

O xatırladıb ki, aprelin sonlarında KİV-də AXCP lideri Əli Kərimlini təbrik etdiyinə görə onun oğlunu döyüblər, karserə salıblar.

Ananın sözlərinə görə, o, işgəncə faktı ilə bağlı Penitensiar Xidmətə, ombudsmana və Beynəlxalıq Qırmızı Xaç Komitəsinin (BQXC) Bakı nümayəndəliyinə müraciət edib.

"Ancaq Qırmızı Xaç reaksiya verib. Qurumun əməkdaşları Abbasa baş çəkiblər. Abbas başına gələnləri onlara danışıb. Onlar getdikdən sonra Abbasa yenidən əziyyət veriblər, dirəyə bağlayıblar", - R.Hüseynova bildirib.

Ancaq Penitensiar Xidmətin ictimaiyyətlə əlaqələr şöbəsindən A.Hüseynova işgəncə verilməsi barədə fikirləri təkzib edərək "uydurma" adlandırıb.

BQXK Bakı nümayəndəliyində qurum əməkdaşlarının A.Hüseynovla görüşü ilə bağlı şərh verməyiblər.

"BQXK nümayəndələri cəzaçəkmə yerlərinə gedirlər. Ancaq məhbusların şəxsiyyəti, onlarla müzakirə olunan məsələlər açıqlanmır, çünki konfidensial xarakter daşıyır", - BQXK ictimaiyyətlə əlaqələr şöbəsinin rəhbəri İlahə Hüseynova bildirib.

Bundan öncə hüquq müdafiəçilərindən ibarət bir qrup işgəncələrlə bağlı məlumatın araşdırılması xahişilə Azərbaycanın dövlət orqanlarına müraciət edib. Ancaq heç bir reaksiya yoxdur.

A.Hüseynov 2015-ci il Nardaran hadisələri ilə bağlı 20 il azadlıqdan məhrum edilib.-06B--