Siyasi mühacirin qardaşı həbs edilib

Bakı/24.02.18/Turan: Fevralın 23-də Bakının Nəsimi rayonunda mülki geyimli şəxslər Elgiz Sadıqlı adlı şəxsi saxlayıblar və Sabunçu rayon polis idarəsinə aparıblar. Bir müddət sonra Sabunçu rayon məhkəməsinin hakimi Süleyman Ağayev Elgizi 30 gün müddətinə həbs edib. Bu barədə Turan-a saxlanılan şəxsin atası Əlövsət Sadıqlı bildirib.

Onun sözlərinə görə, hələlik oğlunun harada olduğu məlum deyil. "Sabunçu rayon Polis İdarəsindən bildirdilər ki, Elgiz Binəqədi rayonundakı İnzibati Həbs Olunanların Saxlanma Məntəqəsinə təhvil verilib. Məntəqədə isə dedilər ki, orada Elgiz Sadıqlı adlı şəxs yoxdur. Oğlumun harada saxlabıldığı, hansı maddə ilə həbs olunduğu barədə məlumat ala bilmirik", deyə Əlövsət Sadıqlı qeyd edib. O, həmçinin Elgizin məhz nədə ittiham olunduğunu bilmir.

Xatırladaq ki, Elgiz Almaniyada yaşayan və Avropada keçirilən etiraz aksiyalarında Azərbaycan hakimiyyətini fəal şəkildə tənqid edən Tural Sadıqlının qardaşıdır.

Fevralın 18-də polis onun atasını - Əlövsət Sadıqlını saxlayıb, bir gün sonra azad edib. "Mənə bildiriblər ki, bu, oğlumun dövlət əleyhinə fəaliyyəti ilə bağlıdır. Mən dedim ki, oğlunun hökumətin əleyhinə, idarəçilik mexanizmi ilə bağlı tənqidi çıxışları ola bilər, amma dövlətin əleyhinə heç zaman çıxış edə bilməz. Dövləti biz qurmuşuq, qurduğumuz dövlətə qarşı çıxa bilmərik", deyə ata bildirib.

Əlövsət Sadıqlı və oğlu Elgiz 2015-ci ildə İlham Əliyevin Almaniyaya səfəri zamanı bir qrup siyasi mühacir etiraz aksiyası keçirdiyi zaman da saxlanılmışdı. Bir ay sonra Elgiz iki il müddətinə azadlıqdan məhrum edilmişdi, amma Apellyasiya Məhkəməsi azadlıqdan məhrumetməni şərti cəza ilə əvəz etmişdi. Həmin vaxtdan etibarən Sadıqlının və digər siyasi mühacirlərin ailələri hakimiyyətin təzyiqi altındadır. -03D-