Sücəddin Şərifov: «Mənim əxlaqımda bir yerdə işləyib başqa yerdən faydalanmaq təhqir sayılır»

“Bu, mənə və “Azadlı    q” qəzetinə qarşı böhtan və şərdir. Yazılanlar tam cəfəngiyyatdır.  Bunu təhqir və  təhdid kimi qiymətləndirirəm. Mənim hər hansı məmurla əlaqəm və  ya görüşüm olmayıb. Jurnalist kimi bütün hərəkətlərim Azərbaycanın qanunvericiliyi daxilindədir”.

Bunu “Azadlıq” qəzetinin redaktoru Sücəddin Şərifov virtualaz.org saytında dərc olunmuş “Azərbaycanın yüksək vəzifəli məmurlarından kimlər müxalifəti maliyyələşdirir?” başlıqlı məlumatla bağlı Turan-ın sualının cavabında bildirib. 

Sayt yazır ki, redaksiyaya Azərbaycanın bəzi yüksək vəzifəli məmurları tərəfindən müxalifət KİV-in, xüsusən də Azərbaycan Xalq Cəbhəsi Partiyasının mətbu orqanı "Azadlıq" qəzetinin və onun eyniadlı saytının maliyyələşdirilməsinə şahidlik edən sensasiyalı faktlar daxil olub.

“Virtualaz.org nümayəndələri "Azadlıq" qəzetinin redaktoru Sücəddin Şərifovla görüşlər keçirən və danışıqlar aparan məmurların adlarını dəqiqləşdirib. Məlumata görə, yüksək vəzifəli məmurlar onların toxunulmazlığı və fəaliyyətlərinin tənqid olunmayacağı zəmanətinin qarşılığında S.Şərifova böyük məbləğdə pullar veriblər. Məmurların S.Şərifova çatdırdıqları maliyyə vəsaiti sonradan Fransaya "Azadlıq" qəzetinin baş redaktoru Qənimət Zahidə göndərilib”, - sayt yazır.

S.Şərifov bildirib ki, dünən bir neçə dəfə saytın rəhbəri  Eynullah Fətullayevə zəng edib.

“Təəssüf ki, Fətullayev telefonunu qaldırmadı. Mənim əxlaqımda bir yerdə olub başqa yerdən faydalanmaq təhqir sayılır. Virtualaz.org saytının yazdıqları ağır ittihamdır. Bu gün onun yazdıqlarının araşdırılması və ictimaiyyətə məlumat verilməsi xahişilə hüquq-mühafizə orqanlarına müraciət edəcəm. Paralel olaraq Mətbuat Şurasından Eynulla Fətullayev və mənim iştirakım ilə virtualaz.org saytının yazdıqları ilə bağlı müzakirə  keçirməsini xahiş edəcəm”, - o qeyd edib.

S.Şərifov həmçinin bu gündən “Azadlıq” qəzetində  fəaliyyətini dayandırdığını deyib. “Bu gündən mənə və “Azadlıq”a qarşı irəli sürülən ittihamların hüquqi araşdırılması ilə məşğul olacam”, - o qeyd edib.-03B-