Sumqayıtlı fəallar hakimiyyətin təqibinə məruz qalır

Müxalifətin 17 sentyabr mitinqindən sonra saxlanılmış Sumqayıtlı fəallar Nuhu Əlicanzadə və Natiq Əlizadə hüquq-mühafizə orqanlarının təzyiqinə məruz qalır.

Hər iki fəal mitinqdən sonra “Məhsul” stadionundan kənara çıxdıqdan sonra saxlanılıblar və Yasamal rayon polis idarəsinə aparılıblar. Burada onlardan başqa 37 saxlanılan şəxs var idi.

Şəxsi məlumatlarını aldıqdan sonra polis saat 22.00-da Əlicanzadəni sərbəst buraxıb.

“Amma mən polis idarəsində olarkən evimizə iki mülki geyimli şəxs və bir polis gəlib. Onlar valideynlərimdən bir daha mənim mitinqə getməməyimi tələb ediblər”, deyə Əlicanzadə Turan agentliyinə bildirib.

Bundan sonra naməlum şəxslər onu daim izləyir. Eyni zamanda, hüquq-mühafizə orqanlarının işçiləri evlərinə zəng edib onun nə ilə məşğul olduğu ilə maraqlanırlar.

Digər fəal Natiq Əlizadə Turan-a bildirib ki, o da mitinqdən sonra stadionun hüdudlarından kənarda saxlanılıb. Polis idarəsində ondan izahat alıblar və mobil telefonundakı kadrları siliblər.

“Mən polis idarəsində olarkən bizə də mülki geyimli üç şəxs gəlib və mənim haqqımda suallar verib. Valideynlərimə deyiblər ki, bu məlumat referendum üçün lazımdır”, deyə fəal bildirib.

Növbəti gün o, şəhər polis idarəsinə çağırılıb, amma getməyib. O da izlənildiyini hiss edib.

“Görünür, bizim tanışlarımızı müəyyən etmək və sonra bizə qarşı hansısa təxribat üçün istifadə etmək istəyirlər”, Əlizadə belə hesab edir.

Qeyd edək ki, hakimiyyət artıq dəfələrlə siyasi fəallara qara yaxmaq istəyərkən bu taktikadan istifadə edib. Bir qayda olaraq, polis casusları ilə “xuliqanlıq” halları təşkil olunur və ya fəalların üzərinə narkotik qoyulur və s.

Sentyabr mitinqlərindən sonra müxalifətin kütləvi aksiyalarını işıqlandıran jurnalistlərə də təzyiq güclənib. -06В-