SOCAR-ın müəssisəndə baş vermis yanğın tam söndürülüb (yenilənib)

SOCAR-ın (Dövlət Neft Şirkəti) Eksperimental Təcrübə-Sınaq İşləri Müəssisəsinin ərazisində baş vermiş yanğın daha geniş sahəyə yayılmasına imkan verilmədən Fövqəladə Hallar Nazirliyinin qüvvələri tərəfindən tam söndürülüb. Bu barədə FHN Mətbuat xidmətinin məlumatında bildirilir.

* * *

Bakı şəhəri, Suraxanı rayonu ərazisində yerləşən SOCAR-ın Neftqazelmitədqiqatlayihə İnstitutunun Eksperimental Təcrübə-Sınaq İşləri Müəssisəsinin ərazisində yanğın baş verib

Fövqəladə Hallar Nazirliyinin məlumatına görə, hadisə yerinə nazirliyin Dövlət Yanğından Mühafizə və Xüsusi Riskli Xilasetmə xidmətlərinin qüvvələri cəlb olunub.

FHN-in qüvvələri tərəfindən görülmüş zəruri və təxirəsalınmaz tədbirlər sayəsində yanğının ətraf ərazilərə, o cümlədən yaxınlıqdakı evlərə keçməsinin qarşısı alınıb.

Hazırda yanğınla mübarizə tədbirləri davam etdirilir.

Yanğın nətiəcsində ölən və ya xəsarət alanların olub-olmaması barədə hələ məlumat verilmir.

Müstəqil mənbələrin məlumatına görə, hadisə yerinə azı 3 təcili tibbi yardım avtomobili gedib.

* * *

Suraxanı rayonunda yerləşən obyektdə güclü yanğın baş verib

Bakının Suraxanı rayonu ərazisində sənaye zonasında bir obyektdə yanğın başlayıb. Yanğının söndürülməsinə FHN-in Dövlət Yanğından Mühafizə Xidmətinin qüvvələri cəlb olunub.

Konkret olaraq hansı obyektin yandığına dəqiqlik gətirilmir.

Sosial şəbəkələrdə yayılan videokadrlardan ərazi üzərində böyük qara göbələk formasında duman görünür. Yanğının söndürülməsinə helikopter də cəlb olunub.

Yanğın yerinə üç "təcili yardım" briqadası göndərilib, bu barədə TƏBİB məlumat verib. İndiyədək hadisə yerində bir nəfərə tibbi yardım göstərilib.

DİN-in Nəqliyyatı İntellektual İdarəetmə Mərkəzi Zığ şossesi-aeroport yolunda hərəkətin məhdudlaşdırıldığını bildirib.