Suriyada müharibə iştirakçılarının işi üzrə məhkəmə başlayıb

Bazar ertəsi Bakı Ağır Cinayətlər Məhkəməsində Ənvər Seyidovun sədrliyi ilə Suriyada döyüş əməliyyatlarında iştirakda ittiham olunan beş Azərbaycan vətəndaşının işi üzrə hazırlıq iclası keçirilib.

Məhkəmə qarşısına Tural Həsənov, Elvin Əliyev, Fərid Muradov, Namiq Məmmədov və Ruslan Mustafayev çıxarılıb.

Vəkil Elmar Süleymanovun Turan-a verdiyi məlumata görə, prosesdə müdafiəçilər müttəhimlərin dəmir barmaqlıqlar arxasından çıxarılması haqqında vəsatət qaldırıblar, belə ki, bu, Avropa İnsan Hüquqları Məhkəməsinin presedent hüququna ziddir və qeyri-insani rəftardır. Lakin məhkəmə vəsatəti təmin etməyib.

Vəkillər həmçinin məhkəməyə xitam verilməsi və işin təkrar istintaqa göndərilməsi barədə vəsatət veriblər. Məhkəmə bu vəsatəti də təmin etməyib, dinləmələri aprelin 6-na təyin edib.

Vəkil Süleymanov müvəkkilinin cinayət təqibini əsassız hesab edir, çünki istintaq təkzibolunmaz heç bir dəlil təqdim etməyib.

“Çoxları oraya gedirlər, real mənzərəni gördükdən sonra qayıdırlar. Yəni onlar döyüş əməliyyatlarında iştirak etməkdən imtina edib qayıdırlar. Lakin onlar müharibə iştirakçısı kimi məsuliyyətə cəlb olunurlar ki, bu, doğru deyil”, deyə vəkil bildirib.

Qeyd edək ki, bu iş üzrə müttəhimlərin adları Milli Təhlükəsizlik Nazirliyi tərəfindən Suriyada döyüş əməliyyatlarında iştirakda ittiham olunan 26 Azərbaycan vətəndaşı siyahısında var. -16D-