Taleh Bağırzadə: «Bura mənə görə məhkəmə deyil, haqq tribunamızdır» (geniş variant)

Noyabrın 16-da Bakı Ağır Cinayətlər Məhkəməsində “Müsəlman Birliyi” Hərəkatının həbsdə olan sədri Taleh Bağırzadə, AXCP sədrinin müavini Fuad Qəhrəmanlı və ötən il noyabrın 26-da Nardaranda baş vermiş hadisələrdə təqsirləndirilən şəxslərin məhkəməsi keçirilib.

Hakim Əlövsət Abbasovun sədrlik etdiyi iclasda  T.Bağırzadə çıxış edərək məhkəməyə gələn şəxslərin təhdid olunduğunu bildirib: “ Cənab hakim, bizdə belə bir məlumat var ki, bura gələn qohumlarımızın, tanışlarımızın şəxsiyyət vəsiqəsini alıb, özlərini də yoxlayıb sonra içəri keçirirlər. Onların ev ünvanları şəxsiyyət vəsiqəsindən götürülür, daha sonra “bandotdel”ə və ya Sabunçu Rayon Polis İdarəsinə çağırılırlar. Şahidlər təhdid olunur, o ki qalmışdı məhkəmədə iştirak edənlər. İndi də onları təhdid edirlər”.

Hakim Ə. Abbasov bildirib ki, əgər kimsə hansısa qanunsuzluqla rastlaşırsa müvafiq qurumlara şikayət etsin.

AXCP sədrinin müavini Fuad Qəhrəmanlı bildirib ki,  bu ölkədə hamı reallığı bilir. Bilir ki, harasa müraciət etsə heç bir faydası olmayacaq. “Lakin mən bildirmək istəyirəm ki, məhkəmə zalında iştirak edənlərə qarşı belə bir rəftar siyasi repressiyanın bir dalğasıdır. Biz istəyirik ki, siz bu hadisə ilə bağlı prokurorluğa müraciət edəsiniz. Bu prosesdə şahidlərə, məhkəmədə iştirak edənlərə hədə-qorxu gəlməklə çalışırlar ki, onlarda elə bir xof yaratsınlar ki, hər kəs qorxsun”, - o vurğulayıb.

Sonra T. Bağırzadə  onun adından yayılan “Taleh Bağırzadənin müraciət” kitabçası haqda danışıb:  “Bizim adımızdan yazıblar ki, “haramçılığın, fahişəliyin tərənnüm etdiyi hökümətə qarşı çıxaq”. Biz belə bir söz deməmişik. Bu proses, ümumiyyətlə, dayandırılmalıdır. Bu sözlərdən bəlli olur ki, özləri nə olduqlarını bilirlər. Bu sözləri bu hakimiyyətin içində olan adamlar deyirlər. Mən nə hakimiyyəti, nə də bu məhkəməni başa düşmürəm”.

Təqsirləndirilən İbrahim Xudaverdiyev qaynının bölməyə çağırıldığını bildirib: “Hakim bəy, bizim evdə kişi qalmayıb. Hamısını tutublar. Həyat yoldaşım məhkəməyə gəlir deyə, qaynımı bölməyə çağırıb deyiblər ki, bacına (İ.Xudaverdiyevin həyat yoldaşı) de məhkəməyə getməsin. Bizə danışmağa imkan vermirsiniz. Zəhmət çəksinlər, Milli Məclisdə qərar çıxarsınlar ki, söz azadlığı cinayətdir, danışmaq olmaz, biz də danışmayaq”.

Daha sonra Cabbar Cabbarov məhkəmə salonundakı şüşədən şikayətləndi. O, hakimə “siz bizə söz verdiniz ki, bununla bağlı tədbir görüləcək. Çünki bizim səsimiz eşidilmir. Əgər bu şüşələri gələn bazar ertəsinə kimi burada görsək sındıracağıq”.

C.Cabbarov  məhkəmə prosesində iştirak edənlərin təhdid olunmasıyla bağlı fikrini bildirib. “Sabunçunun itləri, “bandotdelin” küçükləri camaatı hər dəfə çağırmaqla nə demək istəyir? Əgər bunu İlham Əliyev tapşırıbsa, ilk öncə İlham Əliyev getsin onun həyat yoldaşını söyənləri araşdırsın. T. Bağırzadənin kitabçasında yazıblar ki, “oğru İlham Əliyev”. Getsin onu araşdırsın ki, kim ona oğru deyir”.

Vəkil Yalçın İmanov məhkəmə prosesində iştiak edən şəxslərin şəxsiyyət vəsiqələrindən söz açıb. O bildirib ki, girişdə mülki geyimli şəxslər, şəxsiyyət  vəsiqələrini alır. Bilinmir polisdir, ya məhkəmə nəzarətçiləridir. Heç olmasa, formada olsunlar ki, bilək ki, bizi yoxlayan, bizdən şəxsiyyət vəsiqəsini alan kimdir”.

Sonra məhkəmədə şahid qismində Sabunçu Rayon Polis İdarəsinin sahə müvəkkili Emin Babayev dindirilib. O, ifadəsində bildirib ki, Elçin Qasımov əlində “kulok”la məsciddən çıxıb. Söyüş söyməyə, qışqırmağa başlayıb. Onu nizam-intizama dəvət etsələr  də buna əməl etməyib. Ona görə onu bölməyə aparıblar.

Vəkil Y.İmanov “Elçin Qasımov ruhani bir gəncdir. Ondan  niyə söyüş söydüyünü soruşmadınız?” sualına şahid “xeyr” cavabını verib. 

Şahidin ifadəsi ziddiyət doğurduğu üçün vəkil Y. İmanov  deyib: “Bəs siz deyirsiniz Elçin Qasımovu məscidin qabağında saxlamısınız. Amma digər polis əməkdaşı Yusif Qurbanov öz ifadəsində deyib ki, sizinlə birgə evin qabağında saxlayıb”.

T.Bağırzadə şahidə deyib:  “Siz bilirsiniz ki, Elçin Qasımov kimdir.  Xatırlatma edirəm ki, E.Qasımov “Müsəlman Birliyi” Hərəkatının sədr müavinidir. Özü ruhani insandır, insanlara əxlaq dərsi keçir.  Sizin danışdıqlarınızın heç birini E.Qasımov təsdiq etmədi. İnsanın içində vicdan deyilən şey olmalıdır.”

Daha sonra T.Bağırov Yezidlə bağlı əhvalat danışdığı zaman hakim buna imkan verməyib. T. Bağırov bu etiraza cavab olaraq deyib: “Cənab hakim, siz niyə Yezid adı çəkiləndə narahat olursunuz. Bura mənə görə məhkəmə deyil, haqq tribunamızdır”.

Məhkəmə prosesi noyabrın 18-də davam edəcək.

* 2015-ci il noyabrın 26-da Nardaranda xüsusi əməliyyat zamanı atışma nəticəsində ikisi polis olmaqla, 6 nəfər həlak olub. Bu iş üzrə əksəriyyəti “Müsəlman Birliyi” Hərəkatının üzvləri və tərəfdarları olmaqla, ümumilikdə 70-ə yaxın insan məsuliyyətə cəlb olunub. Onlar CM-in bir sıra maddələri üzrə - konstitusiya quruluşunun zorla dəyişdirilməsi, mütəşəkkil silahlı cinayətkar qrup yaradılması və s. ittiham olunur.

Hazırda Bakı Ağır Cinayətlər Məhkəməsində bu iş üzrə ittiham olunan 18 nəfərin işi üzrə proses gedir. Onların arasında AXCP sədr müavini Fuad Qəhrəmanlı da var. O, dövlət əleyhinə çağırışlarda, dini ədavət salmaqda, kütləvi iğtişaşlara çağırışlarda ittiham olunur. Əslində F.Qəhrəmanlı Facebook səhifəsində nardaranlıları öz hüquqlarını müdafiə etməyə çağıran müraciət yazıb. -36B-

* * *

“Nardaran işi” üzrə ittiham olunan şəxslərin qohumları təzyiqə məruz qalır. Bu barədə Ağır Cinayətlər Məhkəməsində bugünki iclasda işin baş fiqurantlarından biri, “Müsəlman Birliyi” hərəkatının lideri Taleh Bağırzadə bildirib.

O, məhkəmə nəzarətçilərinin ittiham olunan şəxslərin prosesə gələn doğmalarının şəxsiyyət vəsiqələrini yığır. Məhkəmə işçiləri sənədlərin surətini çıxarır, sonradan polis ünvan məlumatlarından istifadə edir, onları tapır və təzyiq göstərir.

Xüsusən, müttəhim İbrahim Xudaverdiyev bildirib ki, onun qohumları prosesdə iştiraka görə təzyiqə məruz qalırlar.

Xudaverdiyevin sözlərinə görə, qaynını polisə çağırıblar və bacısının (Xudaverdiyevin həyat yoldaşı) məhkəməyə getməməsini tələb ediblər.

* 2015-ci il noyabrın 26-da Nardaranda xüsusi əməliyyat zamanı atışma nəticəsində ikisi polis olmaqla 6 nəfər həlak olub. Bu iş üzrə əksəriyyəti “Müsəlman Birliyi” hərəkatının üzvləri və tərəfdarları olmaqla, ümumilikdə 70-ə yaxın insan məsuliyyətə cəlb olunub.Onlar CM-in bir sıra maddələri üzrə - konstitusiya quruluşunun zorla dəyişdirilməsi, mütəşəkkil silahlı cinayətkar qrup yaratmaq və s.-də ittiham olunur.

Hazırda Bakı Ağır Cinayətlər Məhkəməsində bu iş üzrə ittiham olunan 18 nəfərin işi üzrə proses gedir. Onlar arasında AXCP sədr müavini Fuad Qəhrəmanlı da var, o, dövlət əleyhinə çağırışlarda, dini ədavət salmaqda, kütləvi iğtişaşlara çağırışlarda ittiham olunur. Əslində Qəhrəmanlı öz facebook səhifəsində nardaranlıları öz hüquqlarını müdafiə etməyə çağıran müraciət yazıb. -06D-