“Tərtər işi”nin fiqurantlarının ailə üzvlərinin aksiyası

Bakı/14.09.20/Turan: “Tərtər işi” üzrə həbs edilmiş və istintaq zamanı vəfat etmiş şəxslərin ailə üzvləri bu gün Prezident Administrasiyası qarşısında etiraz aksiyası keçirməyə cəhd ediblər.

Onlar həbs edilənlərə bəraət verilməsini və onların azad edilməsini, istintaq zamanı ölənlərə ölümündən sonra bəraət verilməsini, onlara “Şəhid” statusu verilməsini, habelə təqsirkarların cəzalandırılmasını tələb edirlər.

Aksiya iştirakçıları həmçinin bildiriblər ki, dövlət orqanlarına şikayətlərinə cavab verilmir.

“Bu oğlanlar 2016-cı ildə aprel döyüşlərində vuruşurdu, prezidentin özü onları təltif edib. İndi hamısı xəstədir, neçəsi isə dəlixanadadır. Niyə ermənilərlə döyüşən oğlanları məhv etdilər?

Qoy bizi səlahiyyətli şəxslər qəbul etsinlər. Üç ildir səsimizi eşidən yoxdur. İlham Əliyev çıxıb bizə cavab verməlidir. O, elə belə orada oturmayıb, onu prezident təyin ediblər, səlahiyyətli şəxsdir, çıxsın, cavab versin bizə”, deyə aksiya iştirakçılarından biri bildirib.

“Oğlumu 2014-cı il aprelin 30-dan mayın 1-nə keçən gecə həbs ediblər, protokolda isə həbsin tarixini mayın 8-də yazıblar. İşgəncə altında dörd barmağını qırıblar, dişləri qırılıb. Şahidsiz, sübutsuz ittiham ediblər”, deyə digər bir aksiya iştirakçısı bildirib.

Polis etirazçıları Administrasiya binasından uzaqlaşdırıb.

* 2017-ci il mayın 7-də Azərbaycan Baş Prokurorluğu, Dövlət Təhlükəsizlik Xidməti, Müdafiə və Daxili İşlər nazirlikləri Ermənistan xüsusi xidmət orqanlarının xeyrinə casusluqda günahlandırılan bir qrup hərbi qulluqçu və mülki şəxsin həbs edildiyi barədə birgə bəyanat yayıb.

Prokurorluq Cinayət Məcəlləsinin 274-cü (dövlətə xəyanət) maddəsi ilə cinayət işi açıb. Saxlanılan şəxslər müxtəlif müddətə azadlıqdan məhrum ediliblər. Amma tezliklə məlum olub ki, istintaq zamanı şübhəli bilinən ən az 8 nəfər işgəncələr nəticəsində öldürülüb. Sonradan öldürülən 4 nəfərə bəraət verilib, onlara qarşı ittihamları saxtalaşdıran müstəntiqlər isə 7 il müddətinə azadlıqdan məhrum edilib. -30C-