Vaşinqtonda «Azərbaycandakı siyasi məhbuslara dəstək verin!" ianə kampaniyası keçirilib

Yanvarın 31-də Vaşinqtonda  azərbaycanlı fəallar Azərbaycandakı siyasi məhbus ailələrinə maddi yardım məqsədilə ianə kampaniyası çərçivəsində "Azərbaycandakı siyasi məhbuslara dəstək verin!" adlı tədbir keçirib.

"Amerikanın Səsi"nin məlumatına görə, kampaniya zamanı 3 000 ABŞ dolları ianə toplanıb.

Tədbirdə Amerikada yaşayan azərbaycanlılarla yanaşı, Amerika və digər ölkələrin nümayəndələri iştirak edib.

“Biz burada olan insanlara göstərmək istəyirik ki, siyasi məhbuslar bir kütlə deyil, onlar real insanlardır. İnsanlar gəlib bu şəkillərə baxırlar və biz həmçinin açıqça kampaniyası keçiririk. Buradakı insanlar bu açıqçaları imzalayacaqlar və biz toplanan pulla göndərəcəyik həmin ailələrə və onlar görəcəklər ki, biz onları unutmamışıq”, deyə kampaniyanın təsisçilərindən Tamara Grigoryeva bildirib.

Tədbirin digər təşkilatçısı Aynur Cəfər deyib ki, Azərbaycanda siyasi məhbusların əksəriyyəti kişilərdir.

“Ölkədə əsasən kişilər ailənin maliyyə təminatçısı olduğu üçün, onların həbsi ilə ailələri bir sıra maddi çətinliklərlə üzləşir və bu ianə kampaniyası nəticəsində toplanan pulla onlara bir az da olsa, kömək edə bilərik”, deyə o qeyd edib.

Tədbirin iki xüsusi qonağı - ABŞ-ın Azərbaycanakı keçmiş səfiri Riçard Kazlariç və keçmiş siyasi məhbus Adnan Hacızadə olub.

Səfir Kazlariç siyasi baxışlarına görə həbs olunan insanlara yardımın mühümlüyünü deyib.

“Azərbaycandakı siyasi məhbus problemi daim gündəmdə olmalıdır”, deyə o qeyd edib.

2009-cu ildə siyasi fəallığına görə həbs edilən Adnan Hacızadə məhbəsdə olan insanlara məktub yazmağı vacib sayır.

“Bu məktublar onları çox sevindirir və ruhlarını yüksək tutmağa yardım edir”.

O, həmçinin həbsxana yeməklərinin çox pis olduğunu və bu səbəbdən ailələrin məhbuslara yemək apardıqlarını deyib.

“Lakin məhbus ailələrinin çoxunun maddi imkanları buna çatmır. Bu cür ianə kampaniyaları onları maddi cəhətdən  təmin etmək istiqamətində vacibdir”, deyə Hacızadə bildirib.

Tədbirdə azərbaycanlı fotoqraf Cahangir Yusifin "Distance" (Məsafə) adlı fotosərgisi nümayiş etdirilib. Fotosərgidə hazırda həbsdə olan siyasi məhbusların ailələri, eləcə də yeni həbsdən çıxan siyasi məhbusların fotoları yer alıb.

Tədbirdə həmçinin Azərbaycan mahnılarının sədaları altında qonaqlar milli təamlardan da dadıblar.

Sonda Azərbaycandakı siyasi məhbuslara məktublar yazılıb, açıqçalar imzalanıb. -03D-