Vaşinqtonda mötədil islam haqqında konfrans keçirilib

Vaşinqtonda Strateji və Beynəlxalq Araşdırmalar Mərkəzində “Cənubi Qafqaz və Mərkəzi Asiyada dünyəvi və mötədil islam: modellər və problemlər” mövzusunda təşkil edilmiş müzakirələrdə Azərbaycanda din və ifadə azadlığı da diqqət çəkən  məsələlərdən olub.

TURAN-ın müxbirinin tədbirdən verdiyi xəbərə görə, çıxış edən ABŞ rəsmiləri, regionda nifrət hisslərinin aradan qaldırılmasının vacibliyini vurğulayıblar.

“Təkcə əksəriyyətin deyil, hamının səsləri dinlənilməlidir. İfadə azadlığının qorunması, insanlara öz düşüncələrini sosial şəbəkələr və sair vasitələrlə bölüşmək imkanının verilməsi vacibdir", deyə Dövlət Departamentinin müsəlman icmaları ilə iş üzrə xüsusi elçisi Farah Pandith bəyan edib.

Öz növbəsində, Azərbaycan təmsilçiləri ölkədə plüralizm və tolerantlığın "yüksək səviyyədə qorunmasından danışıblar.

Bu zaman əsasən tarixə, "Azərbaycanın Müsəlman dünyasında qadınlara səs verən ilk ölkə olmasına" istinad edilib və eləcə də, son illərdə Heydər Əliyev Fondunun Avropada kilsələrə xərclədiyi vəsaitlər xatırladılıb.

Eyni zamanda, müstəqil ekspertlər Stephen Blank, Svante Cornell, Ariel Cohen çıxışlarında diqqəti Sovet dövründən qalma "psixologiyaya" çəkiblər.

Onların fikrincə, hazırda region dini azadlıqlar və milli kimliklərin müəyyənləşməsi kimi məsələlərdə "keçid dövrünü" yaşayır, belə ki, dini konfessiyalara Sovet-təhsilli xadimlər rəhbərlik edir və ümumilikdə sistem dövlətin nəzarətindədir.

Tədbirdə iştirak edən erməni icmasının nümayəndələri müzakirələri Azərbaycanda Ramil Səfərovun azadlığa buraxılması ilə "aşılanan nifrətə" yönəltməyə çalışıblar, lakin mövzudan kənar olduğu üçün bu barədə suallar cavabsız buraxılıb. -25C-