VCMK referendum ərəfəsində müxalifətçilərə qarşı təqibləri pisləyib

Bakı/24.09.16/Turan: Şənbə günü Vətəndaş Cəmiyyətini Müdafiə Komitəsinin (VCMK) növbəti iclası keçirilib. VCMK üzvü Elçin Həsənov Turan-a bildirib ki, iclas iştirakçıları Konstitusiyaya düzəlişlərlə bağlı referendum ərəfəsində insan hüquqlarının vəziyyətini müzakirə ediblər.

“Tolışi sado” qəzetinin baş redaktoru Hilal Məmmədovun Nizami Rayon Polis  İdarəsinin 25-ci bölməsinə çağırılmasından, ona təzyiqlərin göstərilməsindən, Etibar adlı əməkdaş tərəfindən təhqir olunmasından narahatlıq ifadə edilib.

VCMK polisin özbaşınalığı faktının araşdırılması çağırışı ilə DİN rəhbəri Ramil Usubova müraciət etməyi qərara alıb.

VCMK üzvləri müxalifətin 17 sentyabr mitinqinin iştirakçılarının polisə çağırılması və həbsi pislənilib.

Ümumilikdə, iclas iştirakçıları Konstitusiyaya təklif edilən düzəlişlərlə bağlı plüralist müzakirələr üçün şəraitin olmadığını tənqid ediblər, televiziya və radioda düzəlişlərin xeyrinə birtərəfli təbliğatı pisləyiblər. Qeyd olunub ki, referendumun keçirilməsi üzrə kampaniya xalqın öz iradəsini sərbəst ifadə etməsi üçün şəraiti təmin etməyib.

İnsan hüquqlarının müdafiəsilə bağlı VCMK-nın səylərinin effektivliyinin artırılması haqda qərar qəbul edilib.

Eyni zamanda VCMK-nın yenidən təşkilinə və quruma yeni üzvlərin qəbuluna dair qərar qəbul edilib.

VCMK 2009-cu ildə yaradılıb. O zaman quruma 200-ə yaxın QHT təmsilçisi daxil olub.

Lakin son vaxtlar qurumun işində 20-yə yaxın fəal iştirak edir. Eyni zamanda VCMK-ya daxil olmaq istəyənlər də var.—06D--