Vəkil Elçin Sadıqov həbs olunmuş Cəbrayıl qaçqınlarının yanına buraxılmır

Vəkil Elçin Sadıqov keçən ilin sonunda Biləsuvarda məskunlaşan Cəbrayıl rayon köçkünlərinin elektrik enerjisinin kəsilməsinə görə keçən ilin sonunda keçiridkləri etiraz aksiyasına görə həbs edilənlərin yanına buraxılmır. Bu barədə vəkil Turan agentliyinə bildirib.

Sadıqov iki məcburi köçkünün – Cəlal Quliyev və Zaur Firuzlunun hüquqlarını mdafiə edir. Onlar etiraz aksiyasında iştiraka görə həbs olunublar və CM-in 186.2.2-ci (Əmlakı qəsdən məhv etmə və ya zədələmə), 233-cü (İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315.2-ci (Xidməti vəzifələrini yerinə yetirməsi ilə əlaqədar hakimiyyət nümayəndəsinə qarşı həyat və sağlamlıq üçün təhlükəli olan zor tətbiq etmə) maddələri ilə ittiham irəli sürülüb.

Vəkilin müvəkkillərin yanına buraxılmaması istintaq təcridxanası rəhbərliyi tərəfindən prokurorluqdan icazə məktubunun olmaması ilə əsaslandırılır.

Sadıqov hələ ötən ilin sonlarında prokurorluğa müvafiq məktub göndərib. Amma indiyədək cavab almayıb.

Sadıqov Quliyev və Firuzlunun həbsindən şikayət verib.

Onun sözlərinə görə, hələ Apelyasiya Məhkəməsinin vaxtı müəyyn edilməyib, amma məhkəmənin bu həftədən o yana keçəcəyini düşünmür.

Vəkilin bildirdiyinə görə, Biləsuvarda etiraz aksiyası ilə əlaqədar daha bir neçə nəfər həbs olunub.

Xatırladaq ki, rayonda məskunlaşan bir qrup məcburi köçkün dekabrın 22-də qəsəbələrində elektrik enerjisi kəsildiyinə görə Biləsuvar-İmişli yolunu bağlayıb.

Polis iştirakçılara qarşı güc tətbiq edib, hər iki tərəfdən xəsarət alanlar olub.

Məcburi köçkünlərin məskunlaşdığı 11 qəsəbəyə elektrik enerjisinin verilməsi borcların ödənilməsi şərti ilə bərpa olunub. -05D06-