Keçmiş XİƏN rəhbəri Nicat Quliyevin vəkili Elton Quliyev müvəkkilinin həbsi ilə bağlı KİV-də ona istinadla yayılan, həqiqəti təhrif edən məlumatlarla bağlı bəyanatla çıxış edib.
Vəkilin bəyanatında deyilir ki, N.Quliyev avqustun 7-də saat 19.00-da Novxanı qəsəbəsindəki bağ evindən çıxıb və qonşuluqda yerləşən təsərrüfat malları mağazasına yola düşüb.
Onun arxasınca mağazaya daxil olan bir neçə nəfər özlərini təqdim etməyərək və hər-hansı izahat verməyərək, N.Quliyevi tutub əlinə qandal taxıblar.
Onlar N.Quliyevin öz avtomobilinin arxa oturacağına əyləşdiriblər və MTN-in inzibati binasına aparıblar.
N.Quliyevə hətta evinin yanından keçərkən ev paltarlarını dəyişib, evdə onu gözləyən doğmalarına saxlanıldığını xəbər verməyə belə imkan verməyiblər.
4-5 saat sonra, 23.30 radələrində 20-yə yaxın MTN əməkdaşı N.Quliyevin bağında yalnız onun həyat yoldaşının və yetkinlik yaşına çatmamış qızının olduğunu bilə-bilə hasardan alayaraq keçmiş nazirin bağına daxil olublar, baxmayaraq ki, səs-küyə çıxan N.Quliyevin həyat yoldaşı qapını açıb.
N.Quliyevin həyat yoldaşı bağa girən bütün insanların hərkətlərinə nəzarət etmək iqtidarında olmayıb.
Ailə üzvlərinin mobil telefonları əllərindən alınıb, onlara evdən çıxmaq qadağan edilib.
Heç bir zərurət olmadan saat 23.30-dan səhər 7.00-a qədər axtarış aparılıb.
Nə axtardıqlarını izah etməyən xüsusi xidmətlərin nümayəndələri N.Quliyevin sənədlərini, şəxsi və ailə üzvlərinin həyatı ilə bağlı kompüterləri, fotomaterialları və videokasetləri, dəmir seyfi müsadirə ediblər.
N.Quliyevin həyat yoldaşı bildirib ki, onların evində və həyətində heç vaxt silah olmayıb. Həm də silahın tapıldığı köməkçi məkanı iki gün əvvəl o özü təmizləyib. N.Quliyevin həyat yoldaşı protokolda bunu qeyd edib.
Axtarış zamanı evdə olan ailə üzvlərindən heç kim bağın həyətində axtarış aparanların hərəkətlərinə nəzarət edə bilməyib.
N.Quliyev özü saxlandıqdan dərhal sonra öz vəkili ilə təmin edilməyi və evə zəng etmək imkanı tələb edib. Lakin onun tələblərinə məhəl qoyulmayıb.
Bir neçə saat sonra ona bildiriblər ki, guya avtomobilindən tapança və 8 güllə müsadirə edilib.
Lakin N.Quliyev bu iddiaları təkzib edib. Avtomobilə baxış zamanı N.Quliyevin iştirakı təmin edilməyib.
Saxlandıqdan sonra avtomobil onun nəzarətindən kənar MTN əməkdaşlarının sərəncamında olub.
Guya avtomobildə silah və döyüş sursatları tapıldığını əsas gətirərək, N.Quliyevə qarşı 228.1-ci (qanunsuz silah və döyüş sursatı saxlama) maddə ilə cinayət işi açılıb. Baxmayaraq ki, CPM-in 215.5-ci maddəsinə və Azərbaycan prezidentinin 25 avqust 2000-ci il tarixli 387 saylı fərmanının 3-cü bəndinin 1-ci altbəndinə əsasən, sözügedən maddə üzrə ibtidai istintaq polis orqanları tərəfindən aparılır.
Beləliklə, cinayət işinin başlanması və icraata qəbul edilməsi haqqında qərar səlahiyyəti olmayan orqan və vəzifəli şəxs tərəfindən qəbul edilib.
Növbəti gün səhər N.Quliyev ona qarşı irəli sürülmüş ittiham mətnindən öyrənib ki, guya onun bağında avtomat silah, əl qumbaraları və digər döyüş sursatları aşkar edilib.
N.Quliyev bu ittiham saxta olduğu üçün ifadə verməkdən imtina edib.
Bununla belə, o, Səbail rayon məhkəməsinə çatdırılıb, formal məhkəmə prosesi zamanı onun barəsində 2 ay müddətinə həbs qətimkan tədbiri seçilib.
Məhkəmənin qərarından apellyasiya şikayəti hazırlanıb, bayram günləri ilə əlaqədar şikayət bu həftə N.Quliyevin özü ilə razılaşdırıldıqdan sonra məhkəməyə veriləcək, deyə vəkil E.Quliyevin bəyanatının sonunda bildirilir.
Quliyev 1993-95-ci illərdə XİƏN rəhbəri vəzifəsini tutub. Daha sonra o, Acarıstana gedib, burada 2004-cü ildə istefasına qədər prezident Aslan Abaşidzenin müşaviri olub.
Bundan sonra o, Azərbaycana qayıdıb və Azərbaycanda və Türkiyədə bizneslə məşğul olub.
Quliyev hər-hansı siyasi, ictimai və s. fəaliyyətlə məşğul olmayıb.
2005-ci ilin oktyabrında Quliyev dövlət çevrilişinə cəhd ittihamı ilə bir qrup yüksək vəzifəli şəxs ilə birlikdə həbs edilib. Lakin iki həftə sonra o, azad edilib və bundan sonra cinayət məsuliyyətinə cəlb edilməyib. -06D-
Cəmiyyət
-
Dekabrın 22-də Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağıntısız keçəcəyi gözlənilir. Lakin gecə və səhər bəzi yerlərdə çiskin olacağı ehtimalı var. Mülayim cənub-qərb küləyi əsəcək.
-
Çox vaxt "Qafqazın Dubayı" adlandırılan Bakı getdikcə sakinlərin mənzil hüquqlarının sistematik şəkildə pozulması ilə tanınmağa başlayır. Şəhərin yenilənməsi və yeni eleqant binaların inşası zamanı Azərbaycanın paytaxtında minlərlə ailə qanunsuz olaraq öz evlərindən məhrum edilib. Çoxları müqavimətin faydasız olduğunu bilərək, öz qiymətli əmlaklarına görə qeyri-adekvat pul kompensasiyasına razılaşır. Mənzil Məcəlləsinə inanan azlıq isə tikinti şirkətlərindən ədalətli təzminat tələb edir, ancaq çox vaxt hər şeyi itirir - həm evini, həm də təzminatın istənilən formasını.
-
Düşərgədə iştirak edən məktəblilər ölkəmizi üç nüfuzlu beynəlxalq olimpiadada təmsil edəcək Ölkəmizin beynəlxalq fənn olimpiadalarında təmsil etməyə hazırlaşan şagirdlərin hazırlıq prosesi müvəffəqiyyətlə davam edir. Azercell, Elm və Təhsil Nazirliyi və Təhsil İnstitutunun birgə əməkdaşlığı çərçivəsində Bakı Ali Neft Məktəbində bu məktəblilər üçün növbəti “İnformatika Düşərgəsi” təşkil olunub.
-
Ötən gecə Azərbaycan-Ermənistan sərhədində 4.8, 3 və 3.8 maqnitudalı zəlzələlər baş verib, Azərbaycan Milli Elmlər Akademiyası Respublika Seysmoloji Xidmət Mərkəzi bildirib.
Rəy yaz