Vəkil: Gözləyirlər ki, xəsarət izləri itsin

“Müttəhim Bayram Məmmədov bu gün Baş Prokurorluğun müstəntiqi Asim Səfərəliyevə saxlanılan zaman məruz qaldığı işgənclərlə bağlı ətraflı izahat verdi”. Bunu “Azadlıq Radiosu”na vəkil Elçin Sadıxov bildirib.

Onun sözlərinə görə, digər müttəhim Qiyas İbrahimova belə bir izahat verməyə təcridxana rəhbərliyi şəriat yaratmayıb. Amma Q.İbrahimov vəkili

E.Sadıxov vasitəsilə aşağıdakı açıqlamanı verməyi xahiş edib: “Mən saxlanılan zaman verdiyim izahatdan imtina edirəm, xahiş edirəm ki, vəkilimin yanında məndən işgəncələrlə bağlı izahat alınsın”. Bundan əlavə, E.Sadıxov deyib ki, Q.İbrahimov ötən həftənin cümə günü işgəncə faktları ilə bağlı Daxili İşlər Nazirlyinini Daxili Təhqiqatlar İdarəsi əməkdaşlarına verdikləri izahatının əsas götürülməsini istəyir.

E.Sadıxov  deyib ki, B.Məmmədov saxlanılan zaman işgəncələrə məruz qalmasına və əsassız həbsinə etiraz olaraq mayın 19-dan başladığı aclıq aksiyasını mayın 23-də valideynlərinin xahişi nəticəsində dayandırıb. “Gənclərə hələ də valideynlərilə görüş vermirlər, gözləyirlər ki,xəsarət izləri itsin, sonra görüş versinlər. Xəsarət izləri gənclərin dizlərində, ayaqlarında və biləklərində hələ də qalır”. 

B.Məmmədov və Q.İbrahimovun səhhətlərinin qaydasında olduğunu deyən  vəkil cinayət işini aparan müstəntiqin heykəl üzərinə şüar yazdıqlarına görə gənclərə “tövsiyyə” verdiyini bildirib: “Müstəntiq gənclərə xoşnuz gəlmir, bu ölkədən gedin” tövsiyyəsi verib”.  

Xatırladaq ki, B.Məmmədov və Q.İbrahimov mayın 10-da keçmiş prezident Heydər Əliyevin heykəli üzərinə “Qul bayramınız mübarək” şüarı yazıblar. Bundan sonra gənclər mayın 10-u axşamdan “yox”a çıxıblar. Yalnız mayın 12-də hər iki gəncin Nərimanov rayon Polis İdarəsi nəzdində olan Müvəqqəti Saxlama Yerində saxlandığı aşkar olub. Elə həmin gün hər iki gəncin evlərinə polislər baxış keçiriblər və Daxili İşlər Nazirliyi B. Məmmədovlara və Q.İbrahimovlara mənzillərinin hər birindən 1 kq-dan çox heroin tapılması haqda məlumat yayıblar. Bundan sonra Xətai rayon məhkəməsi önünə çıxarılan gənclər barəsində 4 aylıq həbs qətimkan tədbiri seçiblər.

Bundan əlavə gənclər saxlanılarkən Bakı Polis İdarəsində və Müvəqqəti Saxlanma yerində işgəncələrə məruz qaldıqlarını deyiblər. Vəkil Elçin Sadıxov bu işgəncələri özü gördüyünü təsdiqləyib. Amma Ombudsman Aparatının gənclərə baş çəkən nümayəndləri hər hansı xəsarət faktı aşkarlanmadığı haqda açıqlama yayıb. -05B-