SOCAR və BP arasında D230 blokunda geoloji-kəşfiyyat işlərinə dair memorandum imzalanıb

 Mayın 24-də Azərbaycan Dövlət Neft Şirkəti (SOCAR) və BP şirkəti arasında Xəzər dənizinin Azərbaycan sektorunda Şimali Abşeron hövzəsində D230 blokunda potensial perspektiv strukturlarda geoloji-kəşfiyyat işlərinin aparılmasına  dair anlaşma memorandumu imzalanıb.

Şirkətlərin birgə bəyanatında deyilir ki, memorandum D230 blokunun geoloji-kəşfiyyatı və işlənməsi üzrə saziş bağlanması üçün SOCAR ilə danışıqlar aparmaqdan ötrü BP-yə müstəsna hüquq verir.

Memorandumu Azərbaycan hökuməti adından SOCAR-ın prezidenti Rövnəq Abdullayev və BP-nin Azərbaycan, Gürcüstan və Türkiyə üzrə regional prezidenti Qordon Birrel imzalayıblar.

Blok D230 suyun dərinliyi 300 metrədək və kollektorun dərinliyi 3000-5000 metr olan əraziləri əhatə edir.

“BP Azərbaycanda həyata keçirilən regional və qlobal əhəmiyyətli böyük layihələrin əsas sərmayədarı və operatoru olub. Şirkətlərimiz arasında münasibətlər daim yüksələn xətt üzrə inkişaf edir. Əməkdaşlıq etdiyimiz bütün layihələr üzrə uğurlu nəticələr qazanmışıq. Bu gün yeni bir ofşor layihəsinin əsasını qoyacaq anlaşma memorandumunu imzalayırıq. Bu bizim BP ilə birlikdə uzun illər əməkdaşlığımıza əsas verəcək perspektivlərdən biri olacaq”, - R.Abdullayev bildirib.

Q.Birrel deyib ki, bu gün həm Azərbaycan, həm də BP şirkəti üçün əhəmiyyətli gündür.

“Bu, Azərbaycanda neft və qaz hasilatının uzunmüddətli gələcəyini təmin etmək üçün birgə işləyərək yeni imkanlar axtarmaq sahəsindəki əməkdaşlığımızın davamıdır. Dünyanın digər yerlərində geoloji-kəşfiyyat sahəsindəki geniş təcrübəmizə və sənayedə mövcud olan ən qabaqcıl texnologiyalar üzrə səriştəmizə əsaslanaraq biz bu yeni imkana ümidlə baxırıq və Azərbaycanda neft hasilatının bir çox onilliklər ərzində saxlanılmasına töhfə verməkdə davam edəcəyik”, - o vurğulayıb.

Qeyd edək ki, mayın 24-də prezident İlham Əliyev BP Direktorlar Şurasının sədri Karl-Henrik Svanberqin başçılıq etdiyi və BP qrupunun baş icraçı direktoru Bob Dadlinin də daxil olduğu Direktorlar Şurasının üzvlərindən ibarət nümayəndə heyətini qəbul edib.

Dövlət başçısı deyib ki, 20 ildən artıq davam edən  BP-Azərbaycan əməkdaşlığı nəticəsində çox əhəmiyyətli layihələr uğurla həyata keçirilib. O qeyd edib ki, Azərbaycan hazırda təkcə regional deyil, həm də qlobal əhəmiyyət daşıyan “Cənub” qaz dəhlizi enerji layihəsini həyata keçirmək ərəfəsindədir. 

BP Direktorlar Şurasının sədri Karl-Henrik Svanberq  regionun inkişafı ilə bağlı layihələrdə iştirakdan qürur duyduğunu bildirib. “Şahdəniz-2” və “Cənub” qaz dəhlizi layihələrinin əhəmiyyətinə toxunan qonaq qeyd edib ki, bu layihələr BP-Azərbaycan əməkdaşlığının uzunmüddətli olmasına xidmət edəcək.—06D--