Vəkil: «İstintaq sənədləri müdafiə tərəfinə vermir»

Nardaran hadisələri üzrə cinayət işində 18 polis əməkdaşı zərərçəkən kimi tanınıb. Lakin ibtidai istintaqın başa çatmasına baxmayaraq, prokurorluq polislərə dəyən zərərlə bağlı cinayət materiallarını müdafiə tərəfinə vermir. Bu barədə  Turan-a müttəhimlərdən birinin vəkili Fariz Namazlı bildirib.

Onun sözlərinə görə, istintaq qrupunun rəhbəri Pərviz İbayev sözügedən sənədləri vəkilə verməkdən imtina edərək bildirib ki, bunların müdafiə tərəfinə aidiyyatı yoxdur.

Lakin vəkil qeyd edib ki, onun müdafiə etdiyi şəxs hakimiyyət nümayəndəsinə qarşı zorakılıq tətbiq etmək, qəsdən adam öldürmək, silahlı qrup yaratmaq ittihamları da daxil olmaqla, bir çox maddə üzrə ittiham olunur. Polislər məhz həmin maddələr üzrə zərərçəkən kimi tanınırlar.

F.Namazlı qeyd edib ki, “bu prokurorluqda yeni tendensiyadır”.

Belə ki, bundan əvvəl də jurnalist Xədicə İsmayılovanın işi üzrə istintaq materialları təqdim olunmamışdı.

F.Namazlı bunu müdafiə hüququnun pozulması kimi qiymətləndirir.

Qeyd edək ki, bu iş üzrə 19 nəfər keçir. Onların arasında “Müsəlman Birliyi” Hərəkatının lideri Taleh Bağırzadə da var.

* 2015-ci ilin noyabrında Nardaranda xüsusi əməliyyat keçirilib. Əməliyyat zamanı T.Bağırzadə və onun tərəfdarları saxlanılıblar. Əməliyyat zamanı 6 nəfər öldürülüb. Onların arasında 2 polis işçisi və 4 dindar var.–06D--