Vəkil ombudsmanı işgəncələrə məruz qalmış gənc fəallara baş çəkməyə çağırıb

Vəkil Elçin Sadıqov Kürdəxanı istintaq təcridxanasında polis bölməsində işgəncəyə məruz qalmış müvəkkilləri – gənc fəallar Qiyas İbrahimov və Bayram Məmmədova baş çəkmək xahişi ilə ombudsman Elmira Süleymanovaya müraciət edib.

Sadıqovun sözlərinə görə, hər iki gənc mayın 10-da saxlanıldıqları andan etibarən mayın 13-ü saat 15.00-da Penitensiar Xidmətin istintaq təcridxanasına köçürülənə qədər ardıcıl olaraq insan ləyaqətini alçaldan ağır və şiddətli işgəncəyə və qeyri-insani rəftara məruz qalıblar.

“Mən Nərimanov RPİ-nin içərisində və həyətində quraşdırılmış təhlükəsizlik müşahidə kameralarının görüntülərinin surətini istəsəm də, heç bir cavab almamışam”, deyə vəkil bildirib. Vəkil şəxsən özü mayın 16-da İbrahimovun və Məmmədovun bədənlərində zorakılıq izləri görüb.

“Zorakılıq izləri təcridxana əməkdaşlarına göstərildikdən sonra müayinə üçün həkim çağırmaq vəd olunub. Bundan başqa, həmin vaxt istintaq təcridxanasında olan digər vəkillər də zorakılıq izlərini görüblər. Xətai rayon məhkəməsinin işgəncə faktının araşdırılması haqqında qərar qəbul etməsindən altı gün keçməsinə baxmayaraq, prokurorluq nümayəndəsi nə mənimlə, nə də gənclərlə görüşməyib”, deyə Sadıqov qeyd edir.

Yuxarıda qeyd edilənləri nəzərə alaraq, vəkil ombudsmandan dərhal onun iştirakı ilə istintaq təcridxanasında İbrahimov və Məmmədovla görüşməyi və foto və videoçəkiliş aparmaqla onları müayinə etməyi xahiş edir.

İbrahimov və Məmmədov mayın 10-da Heydər Əliyevin abidəsində qraffiti – “Qul bayramınız mübarək!” və “Rədd olsun sistem!” şüarları yazdıqdan bir neçə saat sonra saxlanılıblar. Bu zaman gənclər böyük ölçüdə narkotik maddələrin qanunsuz dövriyyəsində ittiham olunublar. -06D-