Vəkil polis işçilərinin barmaq izlərinin ekspertizasının keçirilməsini xahiş edir (YENİLƏNİB)

Vəkil Elçin Sadıqov istintaq altında olan gənc fəallar Byram Məmmədova və Qiyas İbrahimova qarşı irəli sürülən narkotik maddə  ittihamı ilə bağlı Bakı Şəhər Baş Polis İdarəsinin İstintaq və Təhqiqat İdarəsinə vəsatət göndərib.  Vəkil bu barədə öz Facebook hesabında yazıb.

Vəkil gənclərə aid olduğu iddia edilən narkotik vasitələrin büküldüyü polietilen torbaların üzərindəki əl-barmaq izlərinin götürülməsini və kimə məxsusluğunu müəyyən etmək üçün ekspertizanı təyin olunmasını xahiş edir.

Vəkil bu polietilen torbaların üzərində neçə əl-barmaq izinin olmasının, bu izlərin neçə nəfərə və kimlərə aid olmasının müəyyən edilməsini xahiş edir.

Həmçinin o, əməliyyatda iştirak etmiş polis işçilərinin, Bakı Şəhəri Baş Polis İdarəsinin Narkotiklərlə Mübarizə İdarəsi rəisinin, onun müavinlərinin və bütün işçilərin  və gənclərin əl-barmaq izlərinin götürülərək ekspertizaya təqdim olunmasına təkid edir.

“Bu vəsatətlər təmin olunarsa sübut olunacaq ki, həmin narkotik vasitələrə Q. İbrahimovun və B. Məmmədovun heç bir aidiyyəti yoxdur. Bunu onların üzərinə polis işçiləri qoyub”, - E.Sadıqov qeyd edib.

O həmçinin bildirib ki, B.Məmmədov işğəncə faktlarının araşdırılmamasına etiraz olaraq beşinci gündür ki, aclıq edir.

Gənclər ittihamları rədd edirlər. Onlar hesab edirlər ki, Heydər Əliyevin abidəsinin üzərinə yazı  yazdıqlarına görə həbs olunublar.—05D06-

2016 May 23 (Bazar ertəsi) 10:45:34

“Müttəhim Bayram Məmmədov mayın 19-dan başladığı aclıq aksiyasını təcridxanada davam etdirir və bu aksiya saxlanılarkən polis tərəfindən işgəncələrə məruz qalmalarına və həbslərinin əsassızlığına etirazdır”. Bunu Turan-a Vəkil Elçin Sadıqov bildirib.

O qeyd edib ki, Qiyas İbrahimovun fiziki durumu aclıq aksiyası keçirməyə imkan vermir. Vəkil Xətai Rayon Məhkəməsinin gənclərin barəsində həbs qətimkan tədbirinə dair vəsatəti təmin etmədiyi üçün apellyasiya şikayəti verildiyini deyib. Onun sözlərinə görə, bu həftə ərzində vəsatətə baxılması gözlənilir.

V.E.Sadıqov bunu da bildirib ki, cümə günü, yəni mayın 20-də Daxili İşlər Nazirlyinin Daxili Təhqiqatlar İdarəsinin əməkdaşları B.Məmmədov və Q.İbrahimovu saxlanılan zaman işgənclərə məruz qalmaları ilə bağlı dindiriblər. “Gənclər bu dindirmənin ciddi mahiyyət daşımadığını deyirlər. Onların açıqlamalarına görə, bu fomral xarakter daşıyıb. Onların fikrincə, hətta polislər öz həmkarlarını müdafiə ediblər”.

Xatırladaq ki, gənc fəallar B.Məmmədov və Q.İbrahinov keçmiş prezident Heydər Əliyevin Mərkəzi Bankla üzbəüz olan heykəlinin üzərinə mayın 10-da “Qul bayramınız mübarək!” şüarı yazıblar. Mayın 10-u axşamdan hər iki gənc yoxa çıxıb. Yalnız mayın 12-də onların Nərimanov Rayon Polis İdarəsi yanında Müvəqqəti Saxlama Yerində olduqları müəyyən edilib. Daha sonra polis hər iki gəncin evində axtarış aparıb, hər evdən 1 kq.-dan çox heroin tapılıb. Mayın 12-də məhkəmə önünə çıxarılan hər iki gəncin barəsində Xətai Rayon Məhkəməsi 4 aylıq həbs qətimkan tədbiri seçib.

Məhkəmədə hər iki gənc saxlanılan zaman polis tərəfindən işgəncələrə məruz qaldıqlarını deyiblər və bununla bağlı məhkəmə işgəncə faktlarının araşdırılması barədə qərar verib. Hazırda hər iki gənc Kürdəxanı təcridxanasında saxlanılır. Ölkənin demokratik kəsiminin təmsilçiləri narkotik maddə itithamının uydurma olması qənaətindədir, həbsə səbəb kimi isə gənclərin heykəl üzərinə yazdıqları şüarı göstərirlər.-05B-