Vəkil Rüfət Səfərovun yanına buraxılmayıb (YENİLƏNİB)

Həbsdə olan Zərdab rayon Prokurorluğunun keçmiş müstəntiqi Rüfət Səfərovun vəkili, ailə üzvləri və hüquq müdafiəçiləri martın 7-də onunla görüşə buraxılmayıb. Bu barədə vəkil Bəhruz Bayramov Turan-a bildirib.

Vəkil Rüfət Səfərovun 3 gün müddətinə cərimə kamerasına (kars) salındığını deyib. Onun qənaətinə  görə, keçmiş müstəntiqə qarşı yeni “təxribat” hazırlanır. “Onun qapalı həbsxanaya görndərmək istəyirlər”, deyə o qeyd edib.

Bayramovun sözlərinə görə, Səfərovun saxlanıldığı 9 saylı Cəzaçəkmə Müəssisəsinin rəisi Baba Gülməmmədovun bu gün qəbul günü olmasına baxmayaraq, o, onları qəbul etməyib.

“Biz nəhayət Penitensiar Xidmətə gəldik. Orada 9 saylı Cəzaçəkmə Müəssisəsinin kuratoru dedi ki, bu məsələni araşdırıb cavab verəcək”, deyə o qeyd edib. -03C-

2017 Mart 07 (Çərşənbə axşamı) 12:26:26

Zərdab Rayon Prokurorluğunun keçmiş müstəntiqi Rüfət Səfərov otaq yoldaşı ilə mübahisə etdiyinə görə 3 günlük karsa salınıb. Bu barədə Rüfət Səfərovun atası Eldar Sabiroğlu həbsxana növbətçisi Babayevə istinadən bildirib. 

“Kapitan Babayevin nəzərinə çatdırdım ki, mübahisənin nədən ibarət olduğunu söyləsin, ancaq o, bundan imtina etdi. Təxminən 15-20 gün bundan əvvəl də qəsdən təxribat yaradaraq onu 7 günlüyə karsa göndərmişdilər”, -ata qeyd edib. 

E.Sabiroğlu bildirib ki, qısa müddətdə bu, ikinci dəfədir ki, keçmiş müstəntiq Rüfət Səfərovun ətrafında təxribat hazırlayaraq onu cəzalandırırlar.

“Yəqin hansısa yeni bir işlər görmək istəyirlər. Bu dərəcədə qanunsuzluğu və insan taleyi ilə oynamağı təsəvvür edə bilmirəm. Bunlar nə etmək istəyirlər?!

Əgər belə davam edərsə günlərin birində Rüfətin vəziyyəti ilə bağlı daha ağır xəbərləri eşitmək mümkündür. Rüfət öz davranışına nəzarət etməyi bacarır və qaydalara da bir hüquqşünas kimi əməl etməyi çox yaxşı bilir. Oğlumun taleyi ilə bağlı məsələni beynəlxalq təşkilatların nəzarətə götürməsini xahiş edirəm. Görünür, Rüfət Səfərovu qapalı cəzaçəkmə müəsissəsinə göndərmyə hazırlıqlar aparılır. İnsaf və vicdan yaxşı bir əlamətdir, bu, olmadıqda istənilən təqibi təsəvvürə gətirmək artıq mənim üçün aşkardır”, - E.Sabiroğlu  bildirib.

Rüfət Səfərov 9 saylı cəzaçəkmə müəssisəsində  saxlanılır. O, bu il yanvarın 19-da da 7 sutkalığa cərimə kamerasına (karser) salınıb.

Keçmiş müstəntiq parlamentin keçmiş deputatı, hakim Yeni Azərbaycan Partiyasının yaradıcılarından biri Eldar Sabiroğlunun oğludur. E.Sabiroğlu ötən il Prezident Administrasiyasının rəhbəri Ramiz Mehdiyevin ünvanına sərt çıxışlar edib. Dekabrda isə R.Səfərov qanunçuluğu pozmasına və hüquq-mühafizə orqanlarının pis işinə görə hakimiyyəti açıq tənqid edib. O, prokurorluq orqanlarından çıxdığını bildirib. Öz növbəsində prokurorluq bəyan edib ki, R.Səfərov “prokurorluq işçisinə yaraşmayan hərəkətə” görə işdən çıxarılıb.

2016-cı il yanvarın 15-də R.Səfərov rüşvət almaq ittihamı ilə həbs olunub. Lakin yanvarın 22-də o, ev dustaqlığına buraxılıb. R.Səfərov ittihamı rədd edib və cinayət işinin sifariş olduğunu bildirib. O, ev dustaqlığı dövründə də mövqeyindən geri çəkilməyib, iqtidarı tənqid edən bəyanatlarını davam etdirib.

R.Səfərov 2016-cı ilin sentyabrında 9 il azadlıqdan məhrumetmə cəzasına məhkum edilib. Dekabrın 22-də Apellyasiya Məhkəməsi R.Səfərovun barəsində hökmü qüvvədə saxlayıb.

R.Səfərov ittihamı qəbul etmir və siyasi sifariş hesab edir.

Vəkil Bəhruz Bayramov Rüfət Səfərova istinadən Facebook səhifəsində onun bu sözlərini yazıb:  “Bu dəmir qəfəs məni heç vaxt sıxa, sındıra bilməz. Çünki seçdiyim yol haqqın yoludur. Ona görə də özümü azad sanıram, həm də çox xoşbəxtəm ki, ruhum qarşısında borclu qalmadım, doğrunu söylədim. İztirablardan, əzablardan qorxmayaq həqiqətləri dedim. Həyatımın sonuna qədər də bu cür qalacağıma əminəm. Ruhum bu gün daha azad, daha xoşbəxtdir. İnsan üçün bundan böyük bəxtəvərlik ola bilməz”. -03B-