Vəkillər ittiham tərəfi mülki işi cinayət işinə döndərməkdə suçlayırlar

Cümə axşamı Bakı Ağır Cinayətlər Məhkəməsində AMAY şirkətlər qrupunun rəhbəri Abdulla Abdullayev və təqsirləndirlən daha 5 nəfər üzərində məhkəmə prosesi davam edib.

Prosesdə əsasən ittiham tərəfin “zərəçəkən” qismində tanıdığı 5 nəfər ifadə verib. Bu beş nəfərdən 4-ü Atatürk prospekti 78/80-37-də tikilən hündürmərtəbəli binada mənizl aldıqları, mənzilin təmirinə başladıqları üçün özlərini zərərçəkən saymadıqlarını deyiblər. Yalnız Orxan Cəfərov adlı zərərçəkən obyekt üçün aldığı 500 kv.metr sahənin başqasına verildiyini iddia edib. Məsələ məhkəmə prosesində aydınlaşdırılanda məlum olub ki, 5 obyekt sahəsindən yalnız biri digər şəxsin aldığı qeyri-yaşayış sahəsilə üst-üstə düşür. Bu məsələdə məhkəmə heyəti O.Cəfərova 4 qeyri-yaşayış sahəsini götürməsi, qalan bir sahəni mülki məhkəmə yolu ilə mübahisələndirməsi tövsiyəsi verib.

Məhkəmədə yaşanan daha bir maraqlı məqam vəkillərlə məhkəmə heyəti arasında olub. Belə ki, vəkillər zərəçəkənlərin şikayətlərini, Sahibkarlığa Yardım Fondu və “Texnikabank”la AMAY şirkəti arasında məsələni mülki məsələ sayaraq, bunun cinayət müstəvisinə çəkilməsini əsassız adlandırıblar. Hakim Əfqan Hacıyev isə öz növbəsində vəkillərə məhkəmə araşdırması getdiyi üçün bütün xüsusatlara məhkəmənin yekununda cavab veriləcəyini xatırladıb.

Zərərçəkənlər gəlmədikləri üçün daha sonra hakim növbəti məhkəmə prosesini aprelin 13-ü saat 10:00-a təyin edib. -05C-