Vətəndaş fəalı Əmiraslanovun məhkəməsi başlayır
Cümə axşamı 15.30-da Sabirabad rayon məhkəməsində 2010-cu ilin may-iyun aylarında baş vermiş daşqından ziyan çəkənlərin hüquqlarını müdafiə edən və daşqının nəticələrinin aradan qaldırılması ilə bağlı korrupsiyaya qarşı mübarizə aparan “Kür” vətəndaş cəmiyyəti qərargahının fəalı İlham Əmiraslanovun işi üzrə məhkəmə iclası keçiriləcək.
Məhkəmənin hazırlıq iclası avqustun 22-də keçirilib.
Əmiraslanov AR CM-in 228.1-ci maddəsi (odlu silah və döyüş sursatları saxlamaq, daşımaq) ilə ittiham olunur. Bu maddə 2 ilədək icbari iş və ya 3 ilədək azadlıqdan məhrumetmə cəzası nəzərdə tutur. O, iyunun 8-də “Makarov” tapançası və onun güllələrini saxlamaq ittihamı ilə həbs olunub.
Əmiraslanov həbs edildikdən sonra bildirib ki, tapançanı və güllələri onun üzərinə qəsdən qoyublar, özü isə polis tərəfindən döyülüb.
Vəkil Samir İsayevin sözlərinə görə, ibtidai istintaq çox sayda pozuntularla aparılıb. Nəzarət üzrə prokurora şahidlərin ifadələrində uyğunsuzluqlar, Əmiraslanovun ona fiziki təzyiq göstərilməsi ilə bağlı adlarını çəkdiyi bəzi polislərin ifadələrinin olmaması barədə məlumat verilib.
Xatırladaq ki, Əmiraslanov iyunun 8-də 2010-cu il daşqınından ziyan çəkənlərin problemlərinin həlli ilə bağlı FHN rəhbəri Kəmaləddin Heydərovla görüşündən 4 gün sonra həbs olunub. Bu, nazirlə ilk görüş deyildi. 24 iyun 2010-cu ildə su altında qalmış kəndlərin sakinləri Bakıya gedən yolu bağlayaraq, Kür çayına bitişik kəndlərin sakinlərinin çöllərə köçürülməsi planına etiraz ediblər. Həmin vaxt Heydərov kənd sakinlərinin qarşısına çıxıb, Əmiraslanov da onuna söhbət edib. Sonradan köçürmə planı ləğv edilib. 5 may 2011-ci ildə Əsgərbəyli, Qasımbəyli kəndlərinin bir qrup sakini prezident İlham Əliyevin kortejinin önünə çıxıb. Prezident onlarla görüşüb və şikayətlərini dinləyib. Əmiraslanov da onunla söhbət edib. Görüşdən bir saat sonra FHN nümayəndəsi Əmiraslanova zəng edib və problemlərin həli üçün Əsgərbəyli kəndi ətrafında görüşməyi təklif edib. Əmiraslanov “Kür” qərargahına bildirib ki, o, deyilən yerə yaxınlaşdıqda oraya qara şüşəli iki ağ “Prado” gəlib, maşınlardan çıxan insanlar onu tutmağa çalışıblar, lakin o, qamışlıqlar arasından onlardan qaçıb. Sonradan ona daim psixoloji təzyiq göstərilib.
Prezident Administrasiyasının ictimai-siyasi şöbəsinin rəhbəri Əli Həsənov iyulun 2-də vətəndaş cəmiyyəti nümayəndələri ilə görüşdə bildirib ki, Sabirabadda həbs olunmuş hüquq müdafiəçisi İlham Əmiraslanovun işinə yüksək səviyyədə baxılacaq.
“Kür” vətəndaş cəmiyyəti qərargahı Əmiraslanovun həbsinin əsl səbəbinin onun 2010-cu il daşqınından ziyan çəkmiş Aran rayonunun əhalisinin hüquqlarını müdafiə fəaliyyəti olmasında israr edir. Bakı istintaq təcridxanasında həbsə alındıqdan sonra Əmiraslanov Baş Prokurorluğun DİN orqanlarında İstintaqa və Təhqiqata Nəzarət İdarəsinin rəisi Kamal Qılıcova işgəncələrə və qeyri-insani rəftara məruz qaldığı barədə şikayət yazıb. -0-
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz