Vətəndaşın nə mənzillərini, nə də pulunu qaytarırlar

Vətəndaş Elşən Məmmədov “Həsənoğlu-96” mənzil tikinti kooperativində məruz qaldığı haqsızlıqlarla bağlı çərşənbə axşamı RATİ-də mətbuat konfransı keçirib.   

E.Məmmədov 2012-ci iln mayında bu MTK-dan aldığı mənzillərin qanunsuz olaraq əlindən alındığını söyləyib. Belə ki, alqı-satqı işi ilə məşğul olan E.Məmmədov 355 min manat nəqd ödəyərək keçmiş Zabitlər bağının içində tikilən hündürmərtəbəli binadan iki mənzil alıb. Bununla bağlı şirkətlə E.Məmmədov arasında müqavilə imzalayıb, mədaxil-maliyyə sənədi verilib.

E.Məmmədov qeyd edib ki, sahibi olduğu 51 saylı mənzil ondan xəbərsiz şirkət tərəfindən Vüqar Fiqarov adlı adama satılıb. 52 saylı mənzilin ona məxsusluğu Nəsimi Rayon Məhkəməsində hakim Səyyad Qafari tərəfindən ləğv edilib. Hələ bu azmış kimi məhkəmə V.Fiqarovla şirkət arasındakı alqı-satqını da qanunsuz sayaraq ləğv edib. 

Bakı Apellyasiya Məhkəməsi birinci instansiya məhkəməsinin qərarını qüvvədə saxlayıb. Hazırda Ali Məhkəmə mərhələsi başlayır. E.Məmmədov Ali Məhkəməni işə ədalətlə baxmağa çağırıb, əks halda bu işin Avropa məhkəməsinə kimi çıxarılacağı barədə xəbərdarlıq edib. E.Məmmədov bu məsələdə MTK-nın təsisçisi Emil Tağıyevi, şirkət əməkdaşları Orxan Sadıqov və Zülü İsgəndərovu əsas təqsirkarlar sayıb, onların həbsinə nail olacağını deyib. 

E.Məmmədov bu məsələdə “Avesta” şirkətlər qrupunun rəhbəri, iş adamı İbrahim İbrahimlini (İbrahim Nehrəmli) də günahkar sayıb. E.Məmmədov mənzilinin ondan xəbərsiz satılması məsələsini aydınlaşdırmaq üçün Z.İsgəndərovla İ.Nehrəmlinin yanına gedib. İ.Nehrəmli məsələni bildikdə E.Məmmədova mailyyə ödənişinə dair sənədin verilməsinə və müqavilənin imzalanmasına əsəbiləşib. E.Məmmədova ödədiyi pulu ala bilməsi üçün “ada”da tikəcəyi binalardan mənzillər götürüb satmağı təklif edib. Təklif qəbul olunmadıqda E.Məmmədova mənzilinin düzgün olaraq əlindən aldığını deyib. Digər mənzilin sənədlərini məhkəmə yolu ilə ləğv etdirəcəyi barədə xəbərdarlıq edib və sonra da reallaşdırıb. 

E.Məmmədov bir il üç ay ərzində müxtəlif dövlət instansiyalarına 500-dən çox şikayət göndərdiyini, amma hər hansı uyğun cavab almadığını, bütün şikayətlərinə “məsələ araşdırılır” cavabının verildiyini söyləyib. Bundan əlavə, 51 saylı mənzilin sənədlərini əlindən almaq üçün şirkətin mühafizəçisi tərəfindən ölüm təhdidlərinə məruz qaldığını deyib. E.Məmmədov bu təhdidlərə baxmayaraq,  haqqını bərpa edənə kimi mübarizəni davam etdirəcəyini bildirib. -05C-