Xədicə İsmayıl akvariumda və ya hakim konvoydan icazə istəyir

Bakı Appellyasiya Məhkəməsində hakim Qail Məmmədovun sədrliyi ilə Xədicə İsmayılın şikayəti üzrə ilkin baxış iclası başlayıb. Xədicə İsmayıl məhkəmə iclasında iştirak edib və o, zalda olanların davamlı alqışı ilə qarşılanıb. Jurnalist gülərüz idi və gümrah görünürdü.

O, şüşə və tam səskeçirməz akvariumda oturdulub. Akvariumun qarşısında çoxsaylı konvoy və nəzarətçilər düzülüb. Xədicə İsmayılı zalda oturanlar görə bilmirdi. Bunlar zaldakıların və vəkillərin etirazı ilə qarşılanıb.

Vəkillər Fariz Namazlı və Yalçın İmanov Xədicə İsmayılın səskeçirməz akvariumdan çıxarılıb vəkillərlə yanaşı oturdulması barədə vəsatət qaldırıb.

“Biz him-cimlə danışa bilmərik. Müdafiə etdiyimiz şəxslə məsləhətləşməliyik”, deyə vəkil Yalçın İmanov sədrlik edənə müraciət edib.

Bu zaman sədrlik edən hakimlərin vəsatətlə razı olduğunu, ancaq konvoylardan icazə alınmasının vacibliyini xatırladıb. Sədrlik edənin bu sözləri zalda və vəkillərdə etiraz doğururb.

“Məhkəməyə konvoylar yox, hakim sədrlik edir. Bu vəsatəti siz təmin etməlisiniz”, deyə İmanov qeyd edib.

Buna baxmayaraq, hakim konvoyla məsləhətləşib və konvoy jurnalistin akvariumdan çıxarılmasına icazə verməyib. Maraqlı olsa da, hakim bundan öncə konvoylardan deyil, vəkillərdən Xədicə İsmayılın təhlükəsizliyi ilə bağlı zəmanət almışdı. 

Bundan sonra məhkəmədə bir müddət fasilə verilib və vəkillər məsləhətləşmək üçün akvariuma daxil olub. Bu zaman konvoylar vəkil Yalçın İmanovu akvariumdan çıxarmağa çalışıb. Nəhayət, sakitləşiblər. 

2015-cui il fevralın 23-də Binəqədi Rayon Məhkəməsinin hakim Sədrəddin Hacıyevin sədrliyi Bakı İstintaq Təcridxanasında keçiriləın iclasında Elman Türkoğlunun iddisaı ilə jurnalist Xədicə İsmayıl 2 500 manat cərimə olunub.

Hakim jurnalisti Cinayət Məcəlləsinin  147.2-ci (böhtan) maddəsi ilə təqsirli bilib.

Keçmiş müxalifətçi Elman Həsənov jurnalistin öz “facebook” hesabında yaydığı bir məlumatda şəxsi həyatına müdaxilə edildiyini və ona böhtan atıldığını iddia edir. Jurnalist ittihamı rədd edir və bunun siyasi motivli olduğunu bildirir. 

Xədicə İsmayıl 2014-cü il dekabrın 5-də başqa ittihamla həbs olunub. O, jurnalist Tural Mustafayevin “özünü öldürmə həddinə çatdırma” iddiası ilə saxlanıb.

Bu il fevralın 13-də jurnalistə qarşı Cinayət Məcəlləsinin 179.3.2 (mənimsəmə və israf etmə - külli miqdarda törədildikdə), 192.2.2 (qanunsuz sahibkarlıq), 213.1(vergi ödəməkdən yayınma) və 308.2-ci (vəzifə səlahiyyətlərindən sui istifadə) maddələri ilə yeni ittihamlar elan olunub.

Bu ittihamlara görə Xədicə İsmayılı 12 ilədək həbs gözləyir.

Xədicə İsmayıl özünü təqsirli bilmir və bu ittihamları da siyasi sifariş sayır.

Azadlıq Radiosunun rəhbərliyi bəyan edib ki, Xədicə İsmayılın həbsi onun ölkə məmurlarının gizli biznesi haqda araşdırmalarına görə hakimiyyətin qisasıdır. Amnesty International jurnalisti “vicdan məhbusu” elan edib.

Bu gün keçirilən ilkin baxış iclasında Elman Türkoğlu iştirak etməyib. Vəkillər xüsusi ittihamçının məhkəmədə iştirakını vacib sayıblar. “Biz bəraət, apellyasiya baxışının məhkəmə istintaqı ilə keçirilməsi barədə vəsatətlər verəcəyik. Bu səbəbdən xüsusi ittihamçının iştirakını vacib hesab edirik”, deyə vəkil Fariz Namazlı qeyd edib.

Xədicə İsmayıl vəsatəti dəstəkləyib. “Kürdəxanı İstintaq Təcridxanasəında keçirilən məhkəmədəmən iştirak etməmişəm və qərar mənim iştirakım olmadan elan edilib. Mən eyni qanunsuzluğun xüsusi ittihsamçıya qarşı da baş verməsini istəmirəm”, deyə jurnalist bildirib. 

Bundan sonra ilkin baxış icıası aprelin 28-i saat 15-dək təxirə salınıb. -0-