Xədicə İsmayılovanın işi üzrə prosesdə jurnalistlərə hücum (YENİLƏNİB-VİDEO)

Jurnalist Xədicə İsmayılovanın işi üzrə prosesi işıqlandırmaq üçün Bakı Ağır Cinayətlər Məhkəməsinə gələn jurnalistlər cümə günü günün ikinci yarısında məhkəmə zalına doldurulmuş bir qrup şəxs tərəfindən fiziki və mənəvi təzyiqə məruz qalıblar.

Təcavüzə jurnalistlərin İsmayılovanın işi üzrə proses haqqında sualı səbəb olub. Onlar “Amerikanın səsi” radiosunun və Turan agentliyinin reportyoru Tapdıq Fərhadoğlunu və “Azadlıq radiosu”nun operatoru İslam Şıxəliyevi təhqir ediblər, onların kameralarını sındırmağa və onları vurmağa çalışıblar. Bu zaman polis baş verənləri sakitcə müşahidə edib.

Məhkəmə prosesinin özündə müttəhim məhkəmə heyətinə etiraz verib, müstəqil mətbuat nümayəndələrinin zala buraxılmamasına etiraz edib. Hakim etirazı baxılmamış saxlayıb.

Daha sonra şahid ifadələri başlayıb. Araşdırmaçı-jurnalist Aynur İmranova bildirib ki, məhkəmə ondan müttəhimin tural Mustafayevlə əlaqələri haqqında soruşub.

İmranova bildirib ki, onların şəxsi münasibətləri haqqında məlumatı yoxdur, amma Mustafayevin keçmiş həyat yoldaşından bilir ki, onun psixi problemləri var, o, üç dəfə intihara cəhd edib. Məhz buna görə onu heç yerdə işə götürmürdülər.

İmranova həmçinin bildirib ki, İsmayılova njurnalistika ilə məşğul olurdu və heç kimə təzyiq göstərə bilməzdi.

Daha sonra Mustafayevin intihara cəhd etdiyi “Park Bulvar” əyləncə mərkəzinin əməkdaşı, habelə ona siçan zəhəri satan şəxs dindirilib, deyə vəkil Fariz Namazlı bildirib.

“Park Bulvar”ın əməkdaşı bildirib ki, onun gözləri qarşısında 4 intihara cəhd hadisəsi baş verib, amma bundan əvvəl heç vaxt məhkəməyə çağırılmayıb.

Növbəti iclas avqustun 10-da keçiriləcək. -06D-

2015 Avqust 07 (Cümə) 14:04:03

Fasilədən sonra davam etdirilən məhkəmə prosesində Xədicə İsmayıl məhkəmə tərkibinə bir daha etiraz edib. Jurnalist prosesin açıq keçirilməsini tələb edib. Bunun üçün isə “Azadlıq” radiosunun və “Azadlıq” qəzetinin əməkdaşları zala buraxılmalıdır. Əks halda o, suallara cavab verməkdən imtina edir. 

Sonra X.İsmayıl dayanmadan eyni tələbi təkrarlayıb. “Jurnalistlər zala buraxılsın... Əks halda ifadə verməkdən imtina edirəm”.

Prokuror təqsirləndirilən şəxsin hərəkətinin məhkəməyə hörmətsizlik kimi qəbul olunmasını təklif edib.

Jurnalist prokuororun təklifinə replika verib: “Siz məndən hörmət gözləyirdiniz ki? Həbs edəcəksinizsə, elə indi edin”, deyə o qeyd edib.

Hazırda məhkəmə heyəti müşavirəyə yollanıb. 

Vəkillər məhkəmə tərkibinə etiraz hazırlayır. -03D-

* * *

Avqustun 7-də jurnalist Xədicə İsmayılovanın işi üzrə prosesdə ittihamnamə oxunub. Bu barədə Turan-a vəkil Fariz Namazlı bildirib.

Lakin zərərçəkən Tural Mustafayev olmadığından CM-in 125-ci maddəsi (özünü öldürmə həddinə çatdırma) üzrə ittiham oxunmayıb. Məhkəmə T.Mustafayevin məcburi qaydada məhkəməyə gətirilməsi barədə qərar qəbul edib.

Müdafiə tərəfi X.İsmayılovaya vəkillərinin yanında əyləşmək imkanları verilməsi barədə vəsatət qaldırıb. Lakin məhkəmə vəsatəti təmin etməyib və X.İsmayılova “akvarium”da qalmalı olub.

Hakim Ramella Allahverdiyeva bildirib ki, “bu, onun təhlükəsizliyi üçün lazımdır”.

Vəkil “Azadlıq” radiosunun Bakı bürosunun vergi yoxlamasının avqustun 14-dək dayandırılması barədə Bakı Vergi Departamentinin qərarının işə əlavə olunmasını xahiş edib.

X.İsmayılova vergidən yayınma, sui-istifadə və digər ittihamları rədd edərək onları gülünc, hüququ əsası olmayan ittihamlar adlandırıb. O, siyasi motivlərlə həbs olunduğunu təkrar edib.

Fasilədən sonra X.İsmayılova ifadə verməyə davam edəcək.–06D-

2015 Avqust 07 (Cümə) 12:19:44

Hakimiyyəti tənqid   edənlərin məhkəmə prosesinin qapalı keçirilməsi Azərbaycanda ənənəyə çevrilir.

Belə ki, bu gün jurnalist Xədicə İsmayılovanın işi üzrə prosesdə hətta onun anasını zala buraxmayıblar.

Məhkəmə zalına yalnız ABŞ, AFR və Fransa səfirliklərinin nümayəndələri daxil ola biliblər.

Niderland və Böyük Britaniya diplomatik missiyalarının əməkdaşları da içəri buraxılmayıb.

Eyni zamanda özlərinin lazım bildiyi adamları arxa qapıdan zala buraxıblar. 

Proseslə əlaqədar təhlükəsilzik tədbirləri gücləndirilib. Ağır Cinayətlər Məhkəməsinin binasının ətrafında gücləndirilmiş polis dəstələri qoyulub.

Xatırladaq ki, Arif və Leyla Yunusların məhkəməsi analoji şəraitdə keçirilir.

*Xədicə İsmayılova 2014-cü il dekabrın 5-də jurnalist Tural Mustafayevi ölüm həddinə çatdırmaq ittihamı ilə həbs olunub. Lakin fevralın 13-də prokurorluq ona qarşı CM-in 179.3.2 (külli miqdarda mənimsəmə), 192.2.2 (qanunsuz sahibkarlıq), 213.1 (vergi ödəməkdən yayınma) və 308.2 (vəzifə səlahiyyətini aşma) maddələri ilə yeni ittihamlar irəli sürüb. O, ittihamları rədd edir və hesab edir ki, hakimiyyətin ali eşelonunda korrupsiya faktlarını araşdırdığına görə təqib olunur.06D-