Xədicə İsmayılovanın məhkəməsində (YENİLƏNİB)

Jurnalist Xədicə İsmayılova proses zamanı bir neçə vəsatət qaldırıb. O, “prokurorluğun mövqeyini nümayiş etdirən, müdafiə tərəfinin sənədlərini və sübutlarını təqdim etməyən” məhkəmə heyətinə etirazını bildirib.

O deyib ki, üç hakimin qanunsuz hərəkətinin araşdırılması üçün Məhkəmə-Hüquq Şurasına müraciət edilməlidir. Lakin məhkəmə bu vəsatətləri rədd edib.

X.İsmayılova onun imzaladığı müqavilələr, ödənişlərin iş materiallarına daxil edilməsi barədə vəsatət qaldırıb. Lakin prokuror bunun əleyhinə olub, hakim Ramella Allahverdiyeva isə onu dəstəkləyib.

Sonra X.İsmayılova “Azadlıq” radiosunun əməkdaşları Ramal Hüseynovun və Elçin Zahiroğlunun şahid qismində məhkəməyə cəlb olunmasına çağırıb. Lakin bu tələb də yerinə  yetirilməyib.

O, Tural Mustafayevi müalicə edən psixiatr Araz Mahmudçaylının məhkəməyə çağırılmasını xahiş edib. Hakim yenə bundan imtina edib.

Başqa bir vəsatət “Azadlıq” radiosunun fəaliyyətinin yoxlanması barədə 2008-ci ilin vergi materiallarının işə cəlb edilməsi olub.

Vəkil Cavad Cavadov ittihamın qanuniliyi il bağlı Konstitusiya Məhkəməsinə müraciət edilməsi barədə vəsatət qaldırıb. Belə ki, X.İsmayılova “Azadlıq” radiosunda çalışarkən Azərbaycan XİN-dən akkreditəsi olmayıb və bu, istintaqa əsas verib ki, onu qanunsuz sahibkarlıqda günahlandırsın.

Hakim bu tələbləri yerinə yetirməkdən imtina edib. Prokuror Ramazan Hadıyev X.İsmayılovanı prosesi yubatmaqda ittiham edib. Sonra fasilə elan olunub.-16D-

2015 Avqust 18 (Çərşənbə axşamı) 11:56:34

Çərşənbə axşamı Bakı Ağır Cinayətlər Məhkəməsində jurnalist Xədicə İsmayılovanın işi üzrə proses yenidən başlayıb.

Əvvəlki günlərdə olduğu kimi, ictimaiyyət nümayəndələri, X.İsmayılovanın qohumları və həmkarları zala buraxılmayıb. Eyni zamanda məhkəmə icraçıları Böyük Britaniya, Almaniya və Avropa İttifaqı səfirliklərinin diplomatlarını içəri buraxıblar. Lakin Norveç təmsilçisi buraxılmayıb.

Qeyri-rəsmi məlumatlara görə, bu gün dövlət ittihamçısının çıxışı gözlənilir.02D-