DSMF tender elan edib

Dövlət Sosial Müdafiə Fondu (DSMF) dövlət sosial sığorta şəhadətnamələrinin hazırlanması üçün 400 min ədəd plastik kartın alınmasına dair tender elan edib.
Fondun elanında bildirilir ki, tenderin şərtlərinə əsasən, qalib seçilərkən aşağıdakı meyarlar nəzərə alınacaq: ən səmərəli təklif, yüksək keyfiyyət, analoji işlərin yerinə yetirilməsi sahəsində təcrübə, kadr potensialı, sifarişin yerinə yetirilməsi üçün maliyyə və texniki imkanların olması.

Tenderdə iştirak edən şirkətlər vergilərə və digər icbari ödənişlərə dair yerinə yetirilməsi vaxtı keçmiş öhdəliklərin olmaması haqqında arayışı tender komissiyasına təqdim etməlidirlər.

Bundan başqa, son 1 il ərzində maliyyə vəziyyətinə dair bank arayışı, son bir il ərzində vergi orqanları tərəfindən təsdiq olunan maliyyə hesabatı, kadr, maliyyə və texniki potensial haqqında rəsmi məlumatlar təqdim etməlidirlər.

Tenderdə iştirak haqqı 250 manat təşkil edir. Tender təklifləri 2015-ci il oktyabrın 1-nə qədər qəbul ediləcək. Təkliflər oktyabrın 2-də qiymətləndiriləcək.

Azərbaycanda sosial sığorta şəhadətnamələri 2006-cı ildən etibarən sosial sığortanın fərdi uçotuna əsaslanan yeni pensiya sisteminə keçidlə əlaqədar olaraq verilir. Hər bir sığortaçı 13 rəqəmli fərdi koda malik şəhadətnamə alıb. Şəhadətnamədə 1-8-ci rəqəmlər sığortaçının doğum tarixini, 9-13-cü rəqəmlər onun fərdi nömrəsini əks etdirir. --17D—