Xədicə İsmayılovanın vəkili Bakı prokuroruna müraciət edib

Həbsdə olan jurnalist Xədicə İsmayılovanın vəkili Yalçın İmanov prokurorluğa müraciət edərək jurnalistin evinə gizli kamera yerləşdirilməklə şantaja məruz qalması ilə əlaqədar istintaq hərəkətlərinə dair məlumat verilməsini istəyib.

Çərşənbə axşamı göndərilən məktubda Y.İmanov xatırladıb ki, jurnalistin şantaj edilməsi və şəxsi həyatına müdaxilə faktı üzrə 15 mart 2012-ci ildə Baş Prokurorluq tərəfindən CM-nin 156-cı (şəxsi həyatın toxunulmazlığı) maddəsilə cinayət işi başlanıb, istintaqın aparılması Bakı Şəhər Prokurorluğuna həvalə olunub.

İstintaq zamanı Xədicə İsmayılova zərərçəkmiş qismində tanınıb.

Amma cinayət işi üzrə icraat Xədicə İsmayılovanın özünə də, vəkilinə də məlum olmayan vaxtda dayandırılıb.

İndiyə qədər istintaqla bağlı hansı tədbirlərin görülməsi barədə jurnalistə, onun nümayəndəsinə heç bir məlumat verilməyib.

Vəkil cinayət işi üzrə istintaqın dayandırılması barədə qərarın surətini, həmçinin indiyə qədər görülən tədbirlər, aparılan istintaq hərəkətləri barədə ətraflı məlumat verilməsini xahiş edib. 

4 saylı cəzaçəkmə müəssisəsində saxlanılan Xədicə İsmayılova 2014-cü il dekabrın 5-də həbs olunub. Jurnalist qanunsuz sahibkarlıq, vergidən yayınma, vəzifədən sui-istifadə kimi ittihamlarla 7 il 6 ay azadlıqdan məhrum edilib. Jurnalist ittihamları qəbul etmir və hökumətin korrupsiyası, özəlliklə, prezident ailəsinin gizli biznesi barədə araşdırma yazılarına görə cəzalandırıldığını bildirir.

“Amnesty İnternational” beynəlxalq hüquq-müdafiə təşkilatı Xədicə İsmayılovanı "vicdan məhbusu" kimi tanıyıb.-06D-