Xırdalanda partlayış zamanı üç nəfər həlak olub (YENİLƏNİB)

Xırdalan şəhərində tikintisi başa çatmamış beşmərtəbəli yaşayış binasında partlayışla əlaqədar axtarış-xilasetmə işləri başa çatıb.

Fövqəladə Hallar Nazirliyinin (FHN)  məlumatına görə, uçqunlar altından 9 nəfər sağ çıxarılıb. Üç nəfər həlak olub.

Partlayışın qaz sızmasından baş verdiyi bildirilir.

Evini itirən üç ailə dövlətin hesabına yeni mənzillə təmin olunacaq. Digər sakinlərin köçürülməsi və binanın sökülməsi məsələsinə baxılır.-16D-

2014 Sentyabr 08 (Bazar ertəsi) 18:00:37

Abşeron rayonu, Xırdalan şəhərində tikintisi başa çatmamış beşmərtəbəli yaşayış binasında partlayış hadisəsi ilə əlaqədar axtarış-xilasetmə işləri davam etdirilir.

FHN-in məlumatına görə, indiyə qədər xəsarət almış 9 nəfər və vəfat etmiş 2 nəfərin meyiti xilasedicilər tərəfindən dağıntılar altından çıxarılaraq aidiyyatı üzrə təhvil verilib. -16D-

2014 Sentyabr 08 (Bazar ertəsi) 15:32:33

Abşeron rayonu, Xırdalan şəhərində tikintisi başa çatmamış beşmərtəbəli yaşayış binasında partlayış hadisəsi ilə əlaqədar axtarış-xilasetmə işləri davam etdirilir.

FHN-in məlumatına görə, hal-hazırki vaxta qədər 9 nəfər xilasedicilər tərəfindən dağıntılar altından çıxarılaraq aidiyyatı üzrə təhvil verilib.

Dağıntılar altında qaldığı ehtimal edilən digər şəxslərin xilasedilməsi istiqamətində işlər davam etdirilir. -16D-

2014 Sentyabr 08 (Bazar ertəsi) 12:24:16

Səhiyyə Nazirliyinin məlumatına görə, hadisə ilə əlaqədar 8 nəfər zərərçəkən xəstəxanaya yerləşdirilib.

Həmin xəstələrin 1-i Sumqayıt Mərkəzi Xəstəxanasının travmatologiya şöbəsinə, 2 nəfər Respublika Yanıq Mərkəzinə yerləşdirilib. Beş nəfər Kliniki Tibbi Mərkəzə gətirilib. Onlardan biri artıq evə buraxılıb.

Səhiyyə Nazirliyinin mətbuat katibi Anar Qədirlinin bildirdiyinə görə, zərərçəkənlərin durumu normaldır.

Lakin Yanıq Mərkəzinin baş həkimi Vüqar Ələkbərov jurnalistlərə deyib ki, mərkəzdə yerləşdirilmiş Vidadi İsmayılovun (1972-ci ildə anadan olub) vəziyyəti ağırdır, bədəninin çox hissəsi yanıb.

Hələlik partlayışın səbəbləri barədə rəsmi açıqlama yoxdur. Lakin partlayışın qaz sızması nəticəsində baş verməsi ehtimalı böyükdür.

Baş prokurorun müavini Rüstəm Usubov, Abşeron Rayon İcra Hakimiyyətinin başçısı hadisə yerinə gəliblər.

Hazırda dağıntılar altında qalan daha 3 nəfərin çıxarılması istiqamətində tədbirlər davam etdirilir.

Bu barədə Fövqəladə Hallar Nazirliyinin mətbuat xidmətindən bildirib.--16D-

2014 Sentyabr 08 (Bazar) 10:56:54

Bu gün  səhər saatlarında  Abşeron rayonu, Xırdalan şəhərində  beşmərtəbəli yaşayış binasında partlayış  baş verib.

FHN-in məlumatına görə,  divarların uçması nəticəsində beş nəfər uçqun altında qalıb. 3 nəfər xilas edilib, 2 nəfərin xilas edilməsi davam etdirilir.

Partlayışın səbəbləri açıqlanmır. Lakin məişət qazının partlaması ehtimal olunur. 2-ci və 3-cü mərtəbələrdə mənzillərin divarları uçub.

Qeyd edək ki, binanın tikintisi başa çatmayıb. Lakin orada qaçqınlar məskunlaşıb.-16D-