Yasamallılar qazsızlığa etiraz edir

Bakı/29.01.18/Turan: Yasamal rayonunun bir qrup sakini qaz təchizatındakı fasilələrdən, qazın aşağı təzyiqlə verilməsindən narazıdır. Sakinlər bu gün, yanvarın 29-u problemin aradan qaldırılması tələbilə Şərifzadə küçəsində əsas yolu bağlayıb.

Sakinlər AzadlıqRadiosunun əməkşdaşlarına deyiblər ki, artıq 1 aydan çoxdur, evlərinə qaz demək olar ki, verilmir. Söhbət Şərifzadə küçəsinin arxa məhəllələrindəki mənzillərdən gedir.

"Bir aydan artıqdır ki, qazın təzyiqi düşüb. Çətinliklə alışır, çayı belə qaynatmır. Qaza baxanlar elə hey bu gün düzələr, sabah düzələr deyirlər. Bezmişik daha bu vəziyyətdən. Son günlərdə havalar şaxtalı keçdiyindən, evə uşaqlar donurlar", Əsgər adlı sakin deyib.

Yolu bağlamağa çıxan digər sakinlər də eyni problemdən əziyyəöt çəkdiklərini bildiriblər. Onlardan bəzisi 15 gün, bəziləri isə hətta 2 aydır ki, qaza həsrət qalıb.

Skinlərin bəziləri deyir ki, yerli əhalinin qazını kəsib, xaricə satırlar. Bəziləri də hesab edir ki, qaz problemini süni yaradıblar.

"Ölkəyə, hökumətə qarşı təxribat yaradırlar. Insanların qazını kəsib, onları ayaga qaldırılar. Bir aydan çoxdur ki qazımız yoxdur. Qazi elə ona görə, vermirlər ki təxribat yaransın", özünü təqdim etməyən, yaşlı sakin belə deyir.

O, əlavə edir ki, gəlinb etiraz etsələr də onları dinləyən yoxdur.

"Heç kim gəlib bir izahat vemir, problemi həll etmir. Elə o çəkir, bu çəkir, o gəlir, bu gedir, ancaq heç bir faydası yoxdur", sakin bildirir.

Sakinlər onu da bildirib ki, dəfələrlə "Azərqaz"a müraciət ediblər. Lakin idarədən onları dinləyən, dərdələrinə çarə edən olmayıb.

Yasamal sakinlərinin yolu bağlaması 15-20 dəqiqə sürüb. Hadisə yerinə dərhal polis qüvvələri cəlb olunub. Onlar sakinləri yoldan uzaqlaşdırıblar.

Sakinlərin qarşısına yalnız Yasamal rayon İcra Hakimiyyətindən gəlmiş nümayəndə çıxıb. O, narazıları əmin edib ki, bir saat ərzində qazın təzyiqi ilə bağlı problem çözüləcək.