Yaxın günlərdə Azərbaycanda qeyri-sabit hava gözlənilir - külək güclənəcək, yağış yağacaq, şimşək çaxacaq, leysan olacaq

Bakı/24.07.23/Turan: İyulun 24-dən 26-dək Azərbaycan ərazisində qeyri-sabit hava şəraiti gözlənilir, külək güclənəcək, yağıntı olacaq.

Həmin müddətdə Bakıda və Abşeronda şimal-qərb küləyinin sürəti saniyədə 15-20 metrə, arabir 23-25 metrə çatacaq, 24 iyul axşamdan 25 iyul səhərə qədər-Abşeron yarımadasının bəzi yerlərində küləyin sürəti saniyədə 28-30 metrə çatacaq

Azərbaycanın rayonlarında, əsasən dağlıq və dağətəyi ərazilərdə 24 iyul axşamdan 26 iyul axşama arabir yağış yağacağı gözlənilir. Ayrı-ayrı yerlərdə yağış leysan xarakterli olacaq, şimşək çaxacaq, dolu düşməsi ehtimalı var.

Qərb küləyinin gücü saniyədə 15-20 metrə, bəzi yerlərdə arabir 25-30 metrə çatacaq.

Çaylarda sululuq artacaq. Bəzi dağ çaylarında qısamüddətli daşqın və sel gözlənilir.

Sutkalıq proqnoza gəlincə, iyulun 25-də gecə və səhər Bakıda və Abşeronda bəzi yerlərdə qısamüddətli yağıs gözlənilir, güclü şimal-qərb küləyi əsəcək, havanın temperaturu gecə müsbət 19 +24, gündüz müsbət 25 +29 dərəcə olacaq.

Bəzi rayonlarda yağış yağacaq, şimşək çaxacaq, bəzi yağıntı leysan xarakterli olacaq.

Havanın temperaturu müsbət  20 +24, gündüz müsbət 29 +34 dərəcə olacaq.

Dağlarda gecə müsbət 9 +14, gündüz müsbət 14 +17 dərəcə gözlənilir. – 06B-