Yeni şəxsiyyət vəsiqələrinin verilməsinə hazrlıq gedir

Ötən gün prezident İlham Əliyev “Yeni nəsil şəxsiyyət vəsiqəsinin tətbiqi ilə bağlı əlavə tədbirlər haqqında” sərəncam imzalayıb.

DİN-ə tapşırılıb ki, şəxsiyyət vəsiqəsi verən yerli orqanlarının və şəxsiyyət vəsiqələrinin fərdiləşdirilməsi mərkəzlərinin təkmilləşdirilməsini, onların zəruri proqram-texniki vasitələrlə təchiz olunmasını təmin etsin.

Bundan əlavə, “Giriş-çıxış və qeydiyyat” idarələrarası avtomatlaşdırılmış məlumat-axtarış sisteminin şəxsiyyət vəsiqələri üzrə alt sisteminin təkmilləşdirilməsi nəzərdə tutulur.

Şəxsiyyət vəsiqəsinin elektron daşıyıcısına daxil edilən və dəyişdirilə bilən məlumatlarda dəyişikliklər edilməsi üçün müvafiq infrastrukturun yaradılması nəzərdə tutulur.

“ASAN xidmət” mərkəzlərində və əhaliyə səyyar xidmət göstərən nəqliyyat vasitələrində də müvafiq proqram-texniki vasitələrin təchizatının və quraşdırılmasının təmin edilməsi təklif olunur.

Rabitə və Yüksək Texnologiyalar Nazirliyinə tapşırılıb ki, vəsiqə sahibinin gücləndirilmiş elektron imzası ilə əlaqədar sertifikatların şəxsiyyət vəsiqələrinin fərdiləşdirilməsi mərkəzlərinə real vaxt rejimində ötürülməsini təmin etsin.

Həmçinin nazirlik şəxsiyyət vəsiqəsi sahibinin gücləndirilmiş elektron imzasından istifadə ilə əlaqədar vətəndaşlardan daxil olan sualların operativ cavablandırılması məqsədi ilə telefon məlumat xidmətinin yaradılmasını və fəaliyyətini təmin etməlidir.

Ədliyyə, Səhiyyə nazirliklərinə, Əmlak Məsələləri Dövlət Komitəsinə, Səfərbərlik və Hərbi Xidmətə Çağırış üzrə Dövlət Xidmətinə  Dövlət Miqrasiya Xidmətinə tapşırılıb ki, şəxsiyyət vəsiqəsinin verilməsi (dəyişdirilməsi) haqqında vətəndaşın ərizə-anketindəki məlumatların real vaxt rejimində yoxlanılması və nəticələrin vahid avtomatlaşdırılmış sistemə ötürülməsini təmin etsinlər.

Sözügedən tədbirlər 2015-ci il dekabrın 1-dək başa çatdırılmalıdır.—06D—