Yevlax sakinindən 78 kiloqram narkotik vasitə müsadirə edilib

Bakı/20.07.22/Turan: Daxili İşlər Nazirliyi (DİN) Baş Narkotiklərlə Mübarizə İdarəsinin (BNMİ) əməkdaşlarının keçirdikləri növbəti xüsusi əməliyyat zamanı Azərbaycana külli miqdarda narkotik vasitələrin qaçaqmalçılıq yolu ilə gətirilməsini və paylanılmasını həyata keçirən Yevlax rayon sakini Seymur Hüseynov saxlanılıb. Bu barədə Daxili İşlər Nazirliyindən bildiriblər. 

Məlumata görə, nəticədə qanunsuz dövriyyədən 78 kiloqram narkotik vasitə və psixotrop maddə çıxarılıb.

Hüseynov qaçaqmalçılıq yolu ilə ölkəyə göndərilən külli miqdarda narkotik vasitəni xarici narkotacirin göstərişi ilə Füzuli rayonunun, Araz Dilağarda kəndi ərazisində qəbul edib, Yevlaxa gətirən zaman isə Baş İdarə əməkdaşları tərəfindən saxlanılıb.

Hüseynovun üzərinə, həmçinin idarə etdiyi "Lifan" markalı avtomobilə baxış zamanı ümumilikdə 78 kiloqram, o cümlədən 47 kiloqram heroin, 26 kiloqram marixuana, 4 kiloqram metamfetamin, 1 kiloqram tiryək və 500 ədəd psixotrop tərkibli satışı qadağan edilən metadon həbi aşkar edilib.

Həsənov saxlanılan zaman polis əməkdaşlarından yayınmağa çalışıb və ehtiyatsızlıqdan idarəetməni itirərək qəza törədib, amma hər hansı xəsarət almayıb.

Faktla bağlı Cinayət Məcəlləsinin müvafiq maddələri ilə cinayət işi başlanılıb. Hüseynov narkotiklərin qanunsuz dövriyyəsində təqsirli bilindiyi üçün barəsində məhkəmə qərarı ilə həbs qətimkan tədbiri seçilib.

Məlumata görə, Hüseynovun xaricdə və ölkə daxilindəki cinayət əlaqələrinin müəyyən olunması istiqamətində əməliyyat-axtarış və əməliyyat-texniki tədbirlər davam etdirilir. 05D