Zakir Qaralov QHT və medianı yeni təqiblərlə hədələyir

Baş prokuror Zakir Qaralov QHT və xarici medianın Azərbaycan qanunlarına  əməl etmədiyini bildirib. Bu barədə o, cümə axşamı jurnalistlərlə söhbətində deyib.

Onun sözlərinə görə, bəzi QHT-lər qeydiyyatdan keçmir, aldıqları vəsait haqda hesabatları dövlət orqanlarına təqdim etmirlər.

Xarici media isə yerli jurnalistlərlə müvafiq müqavilə bağlamır.

Z.Qaralovun dediklərinə görə, bəzi QHT öz hesabatlarında aldıqları vəsaitin həcmini az göstərir.

O, QHT və jurnalistləri qanunvericiliyin tələblərini pozmamağa çağırıb.

  “Əgər onlar bundan sonra da öz himayədarları ilə birlikdə korrupsiya sxemlərini davam etdirsələr qanun qarşısında cavab verəcəklər”, - Z.Qaralov bildirib.

Xatırladaq ki, 2014-cü ilin yazında bəzi yerli və xarici QHT-lərə qarşı cinayət işləri açılıb. Bu çərçivədə tanınmış fəallar həbs edilib, onlarla QHT-nin bank hesabları dondurulub, onların rəhbərlərinin ölkədən çıxışına qadağa qoyulub.

Nəticədə bir il yarımdır ki, vətəndaş cəmiyyətinin fəaliyyəti iflic vəziyyətinə düşüb.

Ədliyyə Nazirliyi qrantların qeydiyyatını dayandırıb. Bir çox QHT illərdir ki, dövlət qeydiyyatından keçə bilmir, odur ki, baş prokurorun iradları məntiqsizdir.

Qeyd edək ki, QHT-lərə qarşı işlərin araşdırılmasında “şəffaf” olan prokurorluq və DİN Azərbaycan Beynəlxalq Bankına qaytarılmayan kreditlərin araşdırılması çərçivəsində iş adamlarının kütləvi şəkildə saxlanması barədə açıqlama vermir.   Bu borcların sayı milyardlarla ölçülür.

Bu proses bir neçə aydır ki, davam edir, lakin ictimaliyyətə heç bir rəsmi məlumat verilmir.–06D-