Zaqatala rayonunda daha iki sakinin qarayara xəstəliyinə yoluxduğu təsdiqlənib

Zaqatala rayonunda daha iki sakinin qarayara xəstəliyinə yoluxduğu təsdiqlənib. Təsdiqlənmiş yoluxma hallarının ümumi sayı üçə çatıb.

Bu gün Səhiyyə Nazirliyi və Tibbi Ərazi Bölmələrini İdarəetmə Birliyi (TƏBİB) Azərbaycan ərazisində aşkar edilmiş qarayara xəstəliyinə yoluxma halları ilə bağlı birgə məlumat yayıblar.

Bildirilib ki, iyunun 7-də Zaqatala rayonu Faldarlı kəndinin 3 sakini qarayara diaqnozu şübhəsilə Bakı şəhəri Kliniki Tibbi Mərkəzinə hospitalizasiya olunub. Xəstələrdən birində qarayara diaqnozu təsdiqlənib, tibbi protokola uyğun olaraq müalicəsi davam etdirilir.

Digər iki nəfərdən qarayara şübhəsilə laborator müayinə üçün nümunələr götürülərək Xüsusi Təhlükəli İnfeksiyalara Nəzarət Mərkəzinə göndərilib. Laborator müayinələrin nəticələrinə əsasən, digər iki şəxsdə də qarayara xəstəliyi diaqnozu təsdiqlənib.

Hazırda xəstələrin vəziyyəti qənaətbəxşdir və tibbi protokola uyğun olaraq müalicələri davam etdirilir, məlumatda deyilir.