Zəlzələ nəticəsində yaşayış binalarına və inzibati binalara ziyan dəyib

 Azərbaycanın şimal-qərb rayonlarında Şəkidə sentyabrın 4-də baş vermiş zəlzələ nəticəsində dəyən ziyan qiymətləndirilir.

Azərbaycan Milli Elmlər Akademiyasının Respublika Seysmologiya Xidmət Mərkəzinin məlumatına görə, zəlzələnin gücü 5,9 bal təşkil edib. Episentr Şəkidən 29 km. cənub-şərqdə, 13 km dərinlikdə olub. Burada təkanların gücü 7 bal təşkil edib.

Şəki rayon fövqəladə hallar komissiyasının məlumatına görə, zəlzələ nəticəsində ən çox Turan qəsəbəsindəki və Qaratorpaq kəndindəki tikintilərə ziyan dəyib.

Belə ki, Turan qəsəbəsində 37 fərdi evdə və uşaq bağçasının binasında dərin çatlar yaranıb. Yeddi həyətyanı sahədə hasarlar dağılıb. Həmçinin, qəsəbə icra hakimiyyətinin binasına ziyan dəyib.

Qaratorpaq kəndində uşaq bağçasının binasına ciddi ziyan dəyib və Dövlət Kənd Təsərrüfatı İstehsalat Müəssisəsinin binası qismən dağılıb.

Çayqaraqoyunlu, Aydınbulaq, Göybulaq və Cəyirli kəndlərində 2-3 evdə də çatlar yaranıb.

Oxud kəndində məktəb, Aşağı Küngüt və Bolludərə kəndlərində uşaq bağçaları binalarına ziyan dəyib.

Oğuz rayonunda ən çox Astraxanovka kəndində evlərə ziyan dəyib, 26 evdə böyük və kiçik çatlar yaranıb. Bir evin divarı çöküb və kənd məktəbinin binasına ziyan dəyib.

Həmçinin, Yaqublu, Muxas, Padar, Bayan, Qarabulaq, Böyük Söyüdlü kəndlərində, habelə Oğuz rayon mərkəzindəki evlərdə çatlar yaranıb.

Padar kəndində məktəb qəzalı vəziyyətə düşüb, bu barədə rayonun fövqəladə hallar komissiyası bildirib.

Həmçinin, bəzi kəndlərdə və ölkənin digər şimal-qərb və mərkəzi rayonlarında evlərdə çatlar əmələ gəldiyi haqqında məlumatlar daxil olur. -06D-