11 yaşlı uşağın hamiləliyini əvvəlcədən niyə görən olmadı? - Kəmalə Ağazadə“Çətin sual" qarşısında

Bakı/01.11.21/Turan:  Bir neçə gündür media və sosial media, eləcə də ictimaiyyət İmişlidə baş vermiş hadisənin nəticəsinə görə çalxalanır. İmişli rayonundan olan 11 yaşlı qız 31 həftəlik hamiləliklə xəstəxanaya müraciət edib. Hamilənin azyaşlı olduğunu nəzərə alan həkimlər hüquq-mühafizə orqanlarına müraciət edib.

Qeysəriyyə əməliyyatı ilə uşaq götürülüb. Ailə doğulan körpədən imtina edib. 11 yaşlı ana isə reanimasiyaya yerləşdirilib.

Ailə Qadın və Uşaq Problemləri üzrə Dövlət Komitəsindən bildirilib ki, artıq hadisə ilə bağlı araşdırmalara başlanılıb.

Faktla bağlı Cinayət Məcəlləsinin 149.3.3 (zorlama, təqsirkar şəxs üçün aşkar surətdə on dörd yaşına çatmayan şəxs barəsində törədildikdə) və 150.3.3 (Seksual xarakterli zorakılıq hərəkətləri, təqsirkar şəxs üçün aşkar surətdə on dörd yaşına çatmayan şəxs barəsində törədildikdə) maddələri ilə cinayət işi açılıb.

31 həftəlik hamiləlik niyə gözlə görülmədi? Aidiyyatı qurumlar niyə məsələdən xəbərsiz idilər?

Azərbaycan Uşaqlar Birliyinin sədri Kəmalə Ağazadə Kamran Mahmudovun təqdimatında yayımlanan “Çətin sual” verilişində bu və digər suallara cavab verir. --0--