Almaniya hökuməti azərbaycanlı mühacirləri niyə deport edir? – Əfqan Muxtarlı “Çətin sual` qarşısında

Bakı/20.05.22/Turan: Almaniya höküməti azərbaycanlı siyasi mühacirləri Azərbaycana deport etməkdə davam edir. Mayın 19-u gecə saatlarında Almaniyada sığınacaq almış azərbaycanlı siyasi mühacir Ziya İbrahimlinin yaşadığı evə alman polisi basqın edib, evin qapısını sındıraraq , icəri daxil olublar. Daha sonra Ziya İbrahimlini Almaniyadan deport ediblər.

Bir neçə ay əvvəl də Ziya İbrahimlini Almaniyadan deport etməyə çalışsalar da, orada yaşayan azərbaycanlı siyasi fəallar beynəlxalq təşkilatlara müraciət etməklə bu addımın qarşısını ala bilmişdi. Bu dəfə isə Ziya İbrahimlinin evinə polis qəfil basqın edib, əlindən telefonu alaraq, dərhal ölkədən çıxarıblar.

Almaniyada yaşayan fəalların iddialarına görə, Almaniya hökuməti Azərbaycan hökumətinin sifarişi və göndərdiyi siyahı üzrə mühacirləri deport edir. Bu vaxta qədər Almaniyadan Bakıya deport olunmuş 5 siyasi mühacir müxtəlif ittihamlarla Azərbaycanda həbs edilib.

Bu iddialar nə dərəcədə doğrudur? Niyə azərbaycanlı mühacirlər deport olunur?

Almaniyada yaşayan jurnalist Əfqan Muxtarlı Kamran Mahmudovun təqdimatında yayımlanan “Çətin sual” verilişində bu və digər suallara cavab verir.