Araikin istefası, humanitar yük qalmaqalı, iki ölkəyə nota... – Elxan Şahinoğlu Çətin sualda

Bakı/31.08.23/Turan: Separatçıların lideri Araik Arutyunyanın "prezident" postundan istefa verəcəyilə bağlı xəbərlər təsdiqlənib.

"Sabah istefa ərizəmi təqdim edəcəyəm. Bu, bütün xarici və daxili oyunçularla və geniş ictimaiyyətlə əlaqələrimi nəzərə alaraq iki gün öncə verdiyim son qərardır" , - Arutyunyan Facebook - da yazıb. O deyib ki, ailəsilə birlikdə Dağlıq Qarabağda yaşamağa davam edəcək.

O həmçinin bildirib ki, Qurgen Nersisyanı "dövlət naziri"  postundan azad edib və onun yerinə Samvel Şahramanyanı təyin edib.

Ötən gün 50-yə  yaxın erməniəsilli şəxs Azərbaycanın Livandakı səfirliyi qarşısında aksiya keçirib. Onlar səfirliyin inzibati binasının ətrafındakı hasara zərbələr endiriblər.

Azərbaycanın Xarici İşlər Nazirliyi (XİN) yaydığı məlumata görə, aksiya iştirakçıları özləri ilə gətirdikləri içərisində boya olan və partlayıcı bərkidilmiş şüşələri səfirliyin inzibati binasına atıblar. Hücum nəticəsində səfirliyin heyətinin xəsarət almadığı bildirilir. Nazirlik bildirib ki, səfirliyə edilən hücumla əlaqədar Livanın Xarici İşlər Nazirliyinə nota təqdim edilib.

XİN-in yaydığı digər bir məlumata görə, avqustun 31-də Fransanın Azərbaycandakı səfiri Ann Buayon Xarici İşlər Nazirliyinə çağırılıb.

“Görüş zamanı, Paris şəhərinin meri Ann İdalqo daxil olmaqla Fransanın bir neçə şəhərinin rəhbər şəxslərinin müşayiəti ilə “humanitar yük” adı altında Laçın sərhəd buraxılış məntəqəsi istiqamətinə nəqliyyat vasitələrinin göndərilməsi və həmin şəxslər tərəfindən Azərbaycana qarşı təxribatçı bəyanatlar səsləndirilməsi ilə bağlı XİN-in etiraz notası Fransa səfirinə təqdim edilib”, – məlumatda qeyd olunur.

Bütün bunlar barədə siyasi şərhçi Elxan Şahinoğlu Kamran Mahmudovun təqdimatında yayımlanan “Çətin sual” verilişində danışır.