Bəxtiyar Hacıyev: “Trol şəbəkəsinə hakimiyyət tərəfindən kifayət qədər böyük məbləğlər ayırılır”

Bakı/16.04.21/Turan: “Trollara başda Prezident Administrasiyası olmaqla, AZƏRTAC-dan və Yeni Azərbaycan Partiyasına rəhbərlik edən şəxslərdən müəyyən tezislər verilir və müəyyən linklər göndərilir ki, orada hakimiyyəti tərifləyən, müxalifəti pisləyən və yaxud da ictimai şəxsləri və jurnalistləri pisləyən şərhlər yazsınlar”. Bunu aprelin 15-da “Çətin sual” verilişində ictimai fəal Bəxtiyar Hacıyev Azərbaycanda trol şəbəkəsi ilə bağlı danışarkən deyib.

Aprelin 13-də Britaniyanın The Guardian qəzetində dərc olunmuş “Feysbuk bizim kimi ölkələrlə maraqlanmır: Azərbaycan trol şəbəkəsi qadağadan bir neçə ay sonra geri qayıdır” sərlövhəli məqalədə Feysbuk-un Azərbaycandakı trol şəbəkəsinə qadağalar tətbiq etməsindən altı ay sonra müstəqil xəbər agentlikləri və müxalif siyasətçiləri hədəf alan və dövlətin dəstəyi ilə aparılan trol kampaniyasının yenidən işə başladığı deyilir. Qəzetdə bildirilir ki, Feysbuk-un əməkdaşı Sofi Janqın 2019-cu ilin avqust ayında öz menecerləri və şirkət icraçılarına Azərbaycanda təqib kampaniyasının mövcud olduğu ilə bağlı məlumat verməsindən sonra sosial media şirkəti 14 ay boyunca Azərbaycanın hakim partiyası - Yeni Azərbaycan Partiyasının bir qolunun bu kampaniyanı həyata keçirməsinə imkan verib. Feysbuk 2020-ci ilin oktyabr ayında “koordinasiya edilmiş saxta davranış” əleyhinə qaydaları pozduqlarına görə Yeni Azərbaycan Partiyası ilə əlaqəsi olan 8,000 Feysbuk və İnstagram hesabı və səhifəsini sildiyini elan edib.

Bəxtiyar Hacıyev bildirib ki, Azərbaycanda trol şəbəkəsinin fəaliyyəti ilə bağlı onlar xeyli vaxtdır ki, məlumatlıdırlar.

 “Bizə məlum olan fakt var idi ki, Yeni Azərbaycan partiyası başda olmaqla, bir çox dövlət qurumlarında, dövlətə məxsus müəssisələrdə, gənclər mərkəzlərində və digər yerlərdə trol şəbəkəsi saxlanılır. Bu trollara başda Prezident Administrasiyası olmaqla, AZƏRTAC-dan və Yeni Azərbaycan Partiyasına rəhbərlik edən şəxslərdən müəyyən tezislər verilir və müəyyən linklər göndərilir ki, orada hakimiyyəti tərifləyən, müxalifəti pisləyən və yaxud da ixtimai şəxsləri və jurnalistləri pisləyən şərhlər yazsınlar. Bununla da ictimai rəyə təsir edə biləcəklərini zənn edirlər və bunun müqabilində hakimiyyət tərəfindən kifayət qədər böyük məbləğlər ayırılır. Biz əvvəllər belə bir məlumata malik idik ki, bu trol şəbəkəsini idarə edən şəxs Prezident Administrasiyasının İctimai-Siyasi şöbənin rəhbəri Əli Həsənov idi. Düşünürdük ki, Əli Həsənov vəzifəsindən kənarlaşdırıldıqdan sonra belə primitiv və qeyri-peşəkar trol şəbəkəsini biz bir daha görməyəcəyik. Amma biz baxırıq ki, trol şəbəkəsini idarə edən şəxslər vəzifələrini itirsələr də, həmin o trol şəbəkəsi öz primitiv və qeyri peşəkar davranışlarını davam etdirir”.

Qeyd edək ki, bu mövzunu müzakirəyə çıxaran “Çətin sual” verilişi yayım vaxtı xeyli çətinliklərlə qarşılaşıb. Belə ki, əvvəlcə verilişin yayımını həyata keçirən proqrama qoşulmada problem ortaya çıxıb. Bu səbəbdən saat 15:00-da canlı yayıma çıxmalı olan veriliş 35 dəqiqə gecikib. Müxtəlif alternativ vasitələrdən istifadə ilə proqrama qoşulmaq mümkün olub. Canlı yayım vaxtı isə qonaq qismində çıxış edən Bəxtiyar Hacıyevin səsi bir neçə dəfə texniki qırılmalara məruz qalıb ki, onun səsi eşidilsə də, nə dediyini anlamaq mümkün olmayıb. Bir neçə dəfə Bəxtiyar Hacıyev verilişə təkrar-təkrar qoşulsa da, hər dəfə 3-4 dəqiqədən sonra onun səsi yenə əvvəlki vəziyyətdə eşidilib. Bütün bunlara baxmayaraq, veriliş baş tutub. Tamaşaçılar bunun kiber-hücum və verilişin yayımına müdaxilə olduğunu yazıblar.

Verilişdən sonra Bəxtiyar Hacıyev bildirib ki, o, bir həftə ərzində verilişə qatıldığı vasitə ilə müxtəlif onlayn tədbirlərdə çıxış edib və heç bir problem yaşamayıb. Amma veriliş zamanı belə problemlərin yaranması Bəxtiyar Hacıyevə də təəccüblü gəlib.

Görünür kimlərsə trol şəbəkəsi kimi mövzuların işıqlandırılmasında o qədər də maraqlı deyil. Moderator Kamran Mahmudov isə bu mövzunu davam etdirəcəyini tamaşaçıların diqqətinə çatdırıb.

Verilişdə yaşananları öyrənmək üçün videonu tam izləyə bilərsiniz.-0-