Donald Trampın yenidən ABŞ Prezidenti seçilməsinə Amerikadan baxış – Aleks Raufoğlu Çətin sualda

Donald Trampın ABŞ Prezidenti vəzifəsinə yenidən seçilməsinə nə səbəb oldu? Onun idarəçiliyi iki ölkə arasındakı əlaqələrə necə təsir edəcək? ABŞ siyasətində Azərbaycanda insan hüquqları və demokratiya məsələləri hansı yer tutacaq?

Bu və digər suallara ABŞ-da yaşayan jurnalist Aleks Raufoglu "Çətin sual" proqramında cavab verir.

Raufoglunun sözlərinə görə, Trampın yenidən prezident seçilməsinə səbəb olan əsas amil, Demokrat Co Bayden administrasiyasının fəaliyyəti ilə bağlı seçicilərin narazılığı olub. Bu narazılıq əsasən qiymətlərin ciddi artımı, biznes üçün şəraitin pisləşməsi və qanunsuz miqrasiya problemlərinin dərinləşməsi ilə əlaqəli idi.

Hazırda amerikalılar yeni administrasiyadan iqtisadi strategiyanı əsaslı şəkildə dəyişməyi gözləyirlər, xüsusilə də biznes sahibləri üçün vergi yükünün azaldılmasını, baxmayaraq ki, Tramp hələ ki, öz iqtisadi planını ətraflı təqdim etməyib.

Ekspert qeyd etdi ki, Tramp Florida senatoru Marko Rubionu Dövlət Departamentinin rəhbəri vəzifəsinə təyin edib.

Rubio əvvəllər dəfələrlə ABŞ-ın xarici siyasətinin Çin, İran və Kuba kimi "geopolitik rəqiblərə" qarşı sərtləşdirilməsini dəstəkləyib. O, həmçinin Konqresin Kiyevə son yardım paketini təsdiqləməsinə qarşı səs verib.

Milli Kəşfiyyat Xidmətinin rəhbəri vəzifəsi isə Fox News-un mühafizəkar şərhçisi və keçmiş konqresmen Talsi Gabbarda həvalə edilib. Gabbard Ukraynaya hərbi yardımın ayrılmasına qarşı çıxması ilə tanınır.

Ədliyyə Nazirliyinə isə konqresmen Mett Gets rəhbərlik edəcək, yəni ABŞ-ın baş prokuroru olacaq. Gets, o cümlədən, uşaqların qanunsuz olaraq cinsi istismar məqsədi ilə daşınması ittihamları ilə üzləşmişdi, lakin bu barədə ittihamlar yetərli sübutların olmaması səbəbindən irəli sürülməyib. Bununla belə, Nümayəndələr Palatasının Etika Komitəsi Getsə qarşı araşdırmaları davam etdirir.

Raufoglunun sözlərinə görə, Tramp öz seçki kampaniyasında Baydenin müharibə tərəfdarı kimi göstərildiyi bir şəraitdə sülh göyərçini kimi mövqe tutdu. Halbuki əslində Ukraynadakı müharibəni Bayden başlamayıb, bunu Vladimir Putin edib. Baydenin həmçinin HƏMAS-ın israillilərə hücumunda heç bir rolu olmayıb. Bununla belə, Tramp yeni bir reallıq yaradır ki, burada o sülhməramlı, Bayden isə müharibə təhrikçisi kimi görünür.

Ekspert qeyd etdi ki, Trampın idarəçiliyi dövründə Cənubi Qafqaz regionuna Baydenin dövrünə nisbətən daha az diqqət ayrılacaq ki, bu da Azərbaycanın hakim dairələrinin maraqlarına uyğundur.