2017-ci ilin martından ölkədə manatın məzənnəsi dəyişmir.
Noyabrın 18-də Milli Məclisdə gələn ilin büdcə zərfi layihələri müzakirə olunarkən Mərkəzi Bankın (AMB) sədri Taleh Kazimov qarşıdakı illərdə də manatın məzənnəsinin sabit saxlanılacağından bəhs edib.
"Gələn il, o biri il üzən (sərbəst) məzənnəyə keçmək kimi məqsədimiz yoxdur. Bu il, növbəti illərdə də, büdcə və ortamüddətli xərclərdə də gördüyünüz kimi, manat/dollarda 1.7 məzənnə proqnozlaşdırılıb. Ortamüddətli dövrdə də sabit məzənnə rejimini makroiqtisadi sabitliyin təmin olunması üçün əlverişli hesab edirik", - T.Kazımov bildirib.
2017-ci ilin martından ölkədə manatın məzənnəsi dəyişmir, 1 ABŞ dolları 1 manat 70 qəpik həddində qalır.
Bəs hökumət proqnozlarına əməl edə biləcəkmi?
İqtisadçı Rəşad Həsənov AzadlıqRadiosuna bildirib ki, sabit məzənnə siyasəti məzənnənin məhz 1.70 olacağı demək deyil: "Sabah qərar qəbul edilə bilər və məzənnə dəyişib yenə də sabit saxlanıla bilər. Yəni, sabit məzənnə məzənnənin səviyyəsi deyil, məzənnə siyasətinin növüdür".
Azərbaycanda 2015-ci ildə dalbadal baş verən devalvasiyalar nəticəsində manat iki dəfə dəyər itirib. Sonrakı illərdə məzənnədə baş verən dəyişikliklərdə manat bir qədər də dəyər itirsə də, artıq yeddi ildən çoxdur ki, dəyişməz qalıb.
R.Həsənovun vurğulamasına görə, üzən məzənnəyə keçid üçün iqtisadiyyatın rəqabətli mühiti formalaşmalıdır, iqtisadiyyatın resurslardan asılılığı azalmalıdır: "İxracın yenə də 85-90 faizini neft-qaz gəlirləri formalaşdırır. Qeyri-neft-qaz ixracında struktur baxımından yenə resurs və enerji gəlirləri üstünlük təşkil edir. Belə bir şəraitdə üzən məzənnə Azərbaycanda bazarlarda ciddi volatilliyə (dəyişkənliyə) gətirib çıxara bilər. Neftin qiyməti düşərsə, insanlar həyəcanlanıb dolların kütləvi alışına, neftin qiyməti qalxarsa isə, satışına keçə bilər".
İqtisadçı hesab edir ki, nə vətəndaş, nə dövlət, nə də biznes son 30 il ərzində sərbəst məzənnə rejimi mühitində fəaliyyət göstərmə bacarıqlarına yiyələnə bilib: "Üzən məzənnə rejiminə keçidin pozitiv tərəfləri iqtisadiyyatın rəqabət qabiliyyətinin artması, yerli malların xarici bazarlarda əlverişli şəraitdə satılması imkanı yaratmasıdır. Amma digər tərəfdən, bu, özü-özlüyündə inflyasiya dinamikasına təsir göstərə bilir. Bu gün hökumətin əlində inflyasiya təsir göstərəcək yeganə ciddi alət elə sabit məzənnədir".
İqtisadiyyat
-
Artan ekoloji problemlərlə mübarizə aparan Bakıda ekspertlər və siyasətçilər cümə günü “Davamlı Ətraf Mühit: Yaşıl Enerjiyə Keçid” adlı beynəlxalq elmi konfransda bir araya gəldilər. Tədbirdə çirklənmə ilə mübarizə və bərpa olunan enerji təşəbbüslərinin irəlilədilməsi üçün innovativ strategiyaların təcili ehtiyacı vurğulandı.
-
Qazaxıstan 2024-cü ildə Bakı-Tbilisi-Ceyhan (BTC) boru kəməri vasitəsilə neft tranzitini 5,1% artırmağa hazırlaşır ki, bu da regional əməkdaşlığın artması və enerji marşrutlarının diversifikasiyasını əks etdirir. Turan xəbər agentliyindən əldə edilən məlumatlara görə, BTC vasitəsilə keçən qazax neftinin ümumi həcmi 2024-cü ildə 1,464 milyon tonu ötəcək, halbuki 2023-cü ildə bu rəqəm 1,392 milyon ton təşkil edib.
-
Azərbaycanın enerji sektorunda inqilabi bir inkişaf olaraq, Azərbaycanın aparıcı neft şirkətlərindən biri olan GL Group ölkənin ilk üfüqi quyusunun quruda qazılmasını elan edib. Bu quyu təxminən 400 metrlik lateral hissə ilə 4400 metr dərinliyə çatacaq. Layihə regionun neft kəşfiyyatı tarixində bir mərhələ olacaq və Kürsəngi-Qarabağlı qurudakı yataqlarda həyata keçiriləcək.
-
Azərbaycan Mərkəzi Bankı (AMB) 2024-cü ilin sonuna qədər illik inflyasiya səviyyəsini 5,1% səviyyəsində proqnozlaşdırır ki, bu da 4% ± 2% hədəf diapazonu daxilində rahat şəkildə yerləşir. Lakin son məlumatlar göstərir ki, il ərzində inflyasiya təzyiqi əhəmiyyətli dərəcədə azalıb: oktyabrda inflyasiya səviyyəsi 3,4% təşkil edib ki, bu da sentyabrdakı 3,5%-dən bir qədər aşağıdır. Noyabr ayı üçün rəsmi məlumatlar hələ dərc olunmayıb, bu isə ilin sonuna mümkün düzəlişlər barədə ehtimallara yer buraxır.
Rəy yaz