Zelenski: Ukrayna ölkənin bütün ərazisini bərpa etmək üçün gözləməli ola bilər

DPA: Ukrayna prezidenti Vladimir Zelenski çərşənbə axşamı parlamentdəki çıxışında Rusiya prezidenti Vladimir Putinin hakimiyyətdə qaldığı müddətdə Rusiyanın Ukrayna ərazisinə müvəqqəti nəzarətinin qaçılmaz ola biləcəyini deyib.

“Bəlkə də, Ukrayna öz məqsədlərinə çatmaq və bütün milli ərazisini bərpa etmək üçün Moskvada kiminsə ömrünün sonunn gözləməlidir”, - deyə Ukrayna prezidenti bildirib.

Zelenski həmçinin parlamentə Ukrayna daxilində hərbi, iqtisadi və sosial səylərə diqqət yetirərək, Ukraynanı Rusiyanın təzyiqlərinə daha davamlı etmək planını təqdim edib. Dekabr ayında təfərrüatlar açıqlanacaq.

O, silaha böyük sərmayə qoyuluşundan danışarkən Ukrayna silahlarının Ukraynanın müstəqilliyinin əsas təminatlarından biri olduğunu əsas gətirib.

“Nüvə silahı olmasa belə, biz adi çəkindirmə vasitələri tapa bilərik”, - deyə Zelenski bildirib.

Bu məqsədlə prezidentin sözlərinə görə, gələn il 30 min uzaqmənzilli pilotsuz döyüş təyyarəsi və 3 min qanadlı raketin istehsalı planlaşdırılır. Sursatın yerli istehsalının genişləndirilməsi də planlaşdırılır.

Zelenskinin Ukrayna ilə bağlı planı oktyabr ayında beynəlxalq tərəfdaşlara NATO hərbi alyansına qoşulmaq üçün dəvətin daxil olduğu “qələbə planını” təqdim etdikdən qısa müddət sonra ortaya çıxıb.

Ukrayna 1000 gündür ki, Qərb müttəfiqlərinin dəstəyi ilə Rusiyanın tammiqyaslı işğalından özünü müdafiə edir.