Blogeri kim ölümlə təhdid edir? – Tural Sadıqlı “Çətin sual” qarşısında

Bakı/02.06.22/Turan: Almaniyada yaşayan siyasi mühacir və bloger, “Azad söz” kanalının rəhbəri Tural Sadıqlı özünün facebook səhifəsində mayın 31-də paylaşdığı statusunda həyatına ciddi təhlükə olduğunu yazıb.

“Sizi əmin edirəm ki, həyatıma çox ciddi təhlükə var. Məni bu dəfə qafalarına qoyublar. Tapşırıq Prezident Aparatından gəlib.”

İyunun 1-də isə Tural Sadıqlının valideynləri Prezident Administrasiyasının binası qarşısında etiraz aksiyası keçirməyə cəhd ediblər. Onun atası Əlövsət Sadıqlı bildirib ki, hakimiyyət Avropaya killer göndərib.

“Tural həqiqəti söyləyir. Adamı dinləmək lazımdır, öldürmək yox. Ona qarşı əsassız olaraq üç cinayət işi qaldırıblar, beynəlxalq axtarış elan ediblər, indi isə öldürməyə qərar veriblər. Mən buraya öz hiddətimi və etirazımı bildirmək üçün gəlmişəm", - blogerin atası deyib.

Hadisə yerinə gələn polislər valideynləri maşına oturdaraq Bakının Nərimanov rayonunda Prezident Administrasiyasının qəbul şöbəsinə aparıblar.

Bütün bunlar barədə bloger Tural Sadıqlı Kamran Mahmudovun təqdimatında yayımlanan “Çətin sual” verilişində özü danışır.