Dəniz estakadalarından imtina etmək lazımdır – Mirvari Qəhrəmanlı

Xəzərdə dəniz estakadasının uçması nəticəsində insanların həlak olmasına görə məsuliyyət təhlükəsiz əmək şəraiti yaratmaq öhdəliyi daşıyan işverənin üzərinə düşür. Bu fikri Turan agentliyinin Çətin Sual verilişinə müsahibəsində Neftçilərin Hüquqlarını Müdafiə Komitəsinin sədri Mirvari Qəhrəmanlı dekabrın 15-də Xəzərdə baş vermiş faciəni şərh edərkən bildirib.

Onun sözlərinə görə, 150 m uzunluğu olan estakada qəza vəziyyətində idi və ya sökülməli, ya da əsaslı yenidənqurma işləri aparılmalı idi.

Məhz qəza vəziyyətində olan estakada ona bitişik, içərisində 10 neftçi olan yaşayış vaqonunu da arxasınca çəkib.

Əmək Məcəlləsinə əsasən, vəziyyətə ictimai nəzarəti həmkarlar ittifaqları həyata keçirməlidir. Amma Azərbaycanda həmkarlar ittifaqları işverənə xidmət edir.

80 min nəfərdən ibarət Neft və Qaz Sənayesi Həmkarlar İttifaqları Komitəsinin öz saytı yoxdur.

Əmək müfəttişliklərinin real səlahiyyətləri yoxdur, hələ SOCAR müəssisələrində nəzarətin həyata keçirilməsini demirəm.

İnsanların ölümünə səbəb olan qəzalar cəzasız qalır. 2015-ci ilin dekabrında “Günəşli” yatağındakı platformadan 30-dan çox neftçinin həlak olduğu yanğından sonra heç kim məsuliyyətə cəlb olunmayıb.

Qəhrəmanlı FHN tərəfindən xilasetmə işlərinin aparılmasında da səriştəsizliyə diqqət çəkib. “İndi qəza azsulu yerdə baş verib, amma xilasetmə işləri səriştəsiz keçirildiyinə görə çox sayda texnika və canlı qüvvə cəlb olunmasına baxmayaraq, dənizçilərin cəsədlərini tapa bilmirlər”, deyə o bildirib.

Qəhrəmanlı dənizdə estakadalardan tamamilə imtinanın və dərinsulu platformalara keçməyin zəruri olduğunu hesab edir.

Digər tərəfdən, son illər estakadalarda qəzaların səbəbi rəhbərlərin məsuliyyətsizliyi, təmir işlərinə ayrılan vəsaitin qeyri-şəffaflığı olub, Qəhrəmanlı belə hesab edir. -03D06-