Ekspert: “Məmurlarla iş birliyində olan sahibkarlar gec-tez repressiyalara məruz qalırlar.”

Bakı/14.04.21/Turan: “Məmur sahibkarlığı, inhisarçılıq olan ölkədə sahibkarların əllərindən bizneslərinin alınması mütləqdir.”

 Bunu iqtisadçı, sahibkar Nazim Bəydəmirli aprelin 13-də yayımlanan “Çətin sual” verilişində “ Azərbaycanda biznesi əlindən alınanlar mövzusunda” danışarkən deyib.

Son günlər Azərbaycanda biznesmenlərin Azərbaycanda qurduqları biznesləri hakim dairələr tərəfindən əllərindən alınması ilə bağlı mediada xəbərlər yayılıb. Hazırda məhkəmə prosesi gedən “İdeal” mağazalar şəbəkəsinin həbsdə olan keçmiş sahibi İlqar İsmayılov iddia edir ki, o, “İdeal”ı əlindən alan şəxslərlə bağlı həqiqətləri dilə gətirdiyinə, dövlət orqanlarına şikayətlərinə görə cəzalandırılaraq susdurulmaq üçün həbs olunub. O, hbsində və biznesinin əlindən alınmasında AZAL QSC-nin rəhbəri Cahangir Əsgərovu ittiham edir.

Azərbaycanda fəaliyyət göstərən daha bir iri holdinqin – “AKKORD" şirkətlər qrupunun təsisçisi İlqar Hacıyevin son müsahibəsi də son günlər müzakirə olunan mövzulardandır.  İlqar Hacıyev müsahibəsində deyir ki, 2008-ci ildə şirkəti 4 milyard dollar civarında qiymətləndirilib, illik dövriyyəsi 600 milyon avronu keçib, sonradan biznesmen həbslə, ölümlə hədələnərək 51%-i prezident ailəsinə ötürməyə məcbur edilib. Hacıyev qeyd edir ki, onun tərəfdaşı və himayədarı keçmiş Baş Prokuror Zakir Qaralov olub. Şirkətdə bir dəfə yoxlamada 100 milyon dollar əskik gəlib, Qaralov bunun hesabatını istəyəndə Hacıyev deyib ki, 100 milyon dolları Bəylər müəllim vasitəsilə prezident ailəsinə rüşvət kimi verib. İlqar Hacıyevin dediyinə görə "AKKORD" hər tikinti layihəsindən təxminən 30% "otkat" verib.

Nazim Bəydəmirli deyir ki, Azərbaycanda bu kimi halların yaşanması ilk dəfə deyil ki baş verir.

“Məmurlarla iş birliyində olan, həmin məmurların köməyi ilə tenderlər və satınalmalardan yararlanan sahibkarların mütləq əksıriyyəti gec-tez belə problemlərlə qarşılaşırlar. O baxımdan biznes adamları hər hansı bir işi başladıqda tez bir zamanda və yaxud dövlət satınalmaları ilə bağlı daha çox gəlir əldə etmək xatirinə müəyyən qurumların rəhbərləri ilə separat danışıqlara gedirlər. Nəticə etibarı ilə öz halal bizneslərinə haram qataraq, ictimai vəsaitləri mənimsəmək yolu ilə gec-tez mütləq repressiyalara məruz qalırlar.”

Azərbaycanda iri sahibkarların üzləşdikləri problemlərlə bağlı iqtisadçı, sahibkar Nazim Bəydəmirlinin “Çətin sual” verilişində dediklərini verilişi tam izləməklə tanış ola bilərsiz. –0--