Əli Həsənovun intim görüntüsü, deputatın xalqı cahillikdə suçlaması və “İmam Mehdi”nin həbsi – Aslan İsmayılov “Çətin sual" qarşısında

Bakı/25.08.21/Turan: Prezidentin sabiq köməkçisi Əli Həsənov təhdid olunduğunu, şantaj edildiyini deyir. Bu məlumatı Ə.Həsənov Tvitter hesabında paylaşıb. Bildirib ki, o, gizli çəkilən fotosu ilə şantaj edilir:

“Dünəndən nə zamansa tualetdə mənim gizli şəkildə çəkilmiş və böyür-başı müxtəlif erotik videolarla bəzədilmiş video görüntülərimi yaymamaq üçün bəzi ünvanlardan ciddi təhdid sifarişləri alıram. Bu haqda əvvəlcədən aidiyyəti qurumlara xəbər vermişəm. Bu bir şəbəkə mafiyasının işidir və lazımi anda öz cəzasını alacaqdır.”

Milli Məclisin Səhiyyə komitəsinin üzvü, deputat Məlahət İbrahimqızı saxta COVİD pasportu alanlarla bağlı münasibət bildirərkən yerli mediaya bildirib ki, insanlar dezinformasiya və şayiələrə daha çox inanır, nəinki dövlət adamlarına.

 “Prezidentin köməkçisi danışır, Səhiyyə Nazirliyi və TƏBİB-in rəhbərliyi danışır, deputatlar danışır. İnsanlar bizə inanmır və bu da mənə elə gəlir ki, cahillikdən irəli gəlir. Rəsmi hökumət adamlarına inanmamağı ancaq XXI əsrin cahilliyi adlandırmaq olar”.

İyunun əvvəlində hüquq-mühafizə orqanlarına müraciət edərək Bakıda soyğunçuluğa məruz qaldığını, evindən 9 milyon manat pul, küllü miqdaqda qızıl-zinnət əşyaları aparıldığını deyən sahibkar Aqil Babayevin özü həbs edilib. Aqil Babayev avqustun 4-də həbs edilsə də, Baş Prokurorluq və Daxili İşlər Nazirliyi avqustun 24-də onun həbsi ilə bağlı birgə məlumat yayıblar. Həmin məlumatda deyilir ki, Aqil Babayev özünü zühur etmiş 12-ci İmam Mehdi kimi təqdim edib, onlarla insanı aldadıb. Onun haqqında Nərimanov Rayon Məhkəməsində həbs qətimkan tədbiri seçilib. 

Gündəmdə olan bu və digər məsələlərlə bağlı suallara hüquqşünas Aslan İsmayılov Kamran Mahmudovun təqdimatında yayımlanan “Çətin sual” verilişində  cavab verdi.