Ermənistan müharibə istəyir? – Tərlan Eyvazov Çətin sualda

Bakı/18.04.23/Turan: Azərbaycan Ermənistan sərhəddində aprelin 11-də baş verən son silahlı toqquşmadan sonra hər iki ölkə mediasında müharibə ehtimalını artıran, eyni zamanda qarşılıqlı ittihamlar dolu yazılar yayımlanır.

Yerli mediada Ermənistan parlamentinin eks-deputatı Arman Abovyanın səfərbərlik çağırışı etdiyinə dair açıqlamalar yer alıb. Teleqram kanallarında erməni uşaqlarına poliqonlarda atış təlimlərinin keçirilməsini göstərən videolar yayılıb.

Azərbaycanın siyasi və hərbi ekspertlərinin bir neçəsi isə yerli mediada sərhəddə genişmiqyaslı müharibənin olacağına dair proqnozlar verirlər.

Bundan başqa Yerevanda məhkəmə azərbaycanlı hərbi əsirlər – Aqşin Bəbirov və Hüseyn Axundov barəsində həbs qərarı çıxarıb. Ermənistan Baş Prokurorluğunun yaydığı məlumata görə, Aqşin Bəbirov və Hüseyn Axundov bir qrup şəxs tərəfindən qabaqcadan razılaşdırılaraq dövlət sərhədini qanunsuz keçməkdə, silah-sursat qaçaqmalçılığında və qanunsuz dövriyyəsində ittiham olunurlar.

Aprelin 14-də Yerevanda ağır atletika üzrə Avropa çempionatının açılışı mərasimində Azərbaycan bayrağının yandırılması ilə bağlı Azərbaycan Baş Prokurorluğunda Cinayət Məcəlləsinin 12.2, 283.2.1 (zorakılıq tətbiq etməklə milli nifrət və düşmənçiliyin salınması), 12.2, 283.2.2 (ölkə hüdudlarından kənarda xarici vətəndaşlar tərəfindən öz qulluq mövqeyindən istifadə etməklə Azərbaycana qarşı milli nifrət və düşmənçiliyin salınması), 12.2, 324 (Azərbaycan Respublikasının Dövlət bayrağına qarşı təhqiredici hərəkətlər) maddələrilə cinayət işi açılıb.

Bu gərginlik nəyə gətirib çıxara bilər? Ermənistan ard-arda bu kimi addımlar atmaqla nə etmək istəyir?

Hərbi ekspert Tərlan Eyvazov Kamran Mahmudovun təqdimatında yayımlanan “Çətin sual” verilişində bu barədə danışır.