Gədəbəyin Söyüdlü kəndində etiraz aksiyasında polis əhali qarşıdurması nədən xəbər verir? - Samirə Qasımlı Çətin sualda

Bakı/21.06.23/Turan: İyunun 20-də Gədəbəy rayonunun Söyüdli kəndinin sakinləri yerli əhalinin torpaq sahələrinin iri məmurlar tərəfindən zəbt edilməsi ilə bağlı etiraz aksiyası keçiriblər.

Polis gözyaşardıcı qazdan istifadə edərək aksiyanı dağıdıb, yerli mənbələr bildiriblər.

Söyüdlü kəndində etiraz aksiyasının dağıdılması zamanı 10-a yaxın yerli sakin xəsarət alıb, daha 6 nəfər saxlanılıb. Bu barədə Turan-a yerli sakin Sürəyya Əliyeva məlumat verib.

O deyib ki, qızıl mədəninin turşu tərkibli sularının örüş torpaqlarında qurulmuş gölməçəyə axıdılmasının ekologiyanı pozması, sakinlər arasında xəstəliklərin yaranmasına səbəb olması ilə bağlı rəsmi qurumlara dəfələrlə şikayətlər edilib.

“Artıq kimyəvi tərkibli suların toplandığı bir göl dolub. İndi kəndin on metrliyinə ikinci göl qurmaq istəyirlər. Bu göllər kəndin örüş sahələrində qurulur. Yaşamaq mümkün deyil. Kənd sakinləri gölün qurulmasına etiraz edir. Bu zaman polis güc tətbiq etdi, gözyaşardıcı qazdan istifadə etdi. Kənd sakinləri arasında on nəfərədək xəsarət alanl var.  6 nəfər polis təırəfindən saxlanılıb. Bir qadın da xəsarət alıb. Onun bədənində, üzündə xəsarət izləri var. Əraziyə təcili tibbi yardım gəldi, xəsarət alanlara tibbi yardım göstərildi”, Əliyeva Amerikanın Səsinə deyib.

DİN-in mətbuat xidmətindən bildirilib ki, həmin şəxslərə dəfələrlə xəbərdarlıq edilməsinə, izahedici söhbətlər aparılmasına baxmayaraq, onlar qeyd olunan əraziyə toplaşıblar.

Onlar polisin qanuni tələblərinə qəsdən tabe olmayaraq daşla, küt alətlərlə bir neçə fəhləyə xəsarət yetirib və polis əməkdaşlarına qarşı müqavimət göstərməyə cəhd ediblər. Görülmüş tədbirlərlə qanunsuz aksiyanın iştirakçıları ərazidən uzaqlaşdırılıblar.

O ki qaldı videogörüntülərdə polis əməkdaşının qadınlardan birinə gözyaşardıcı qaz tətbiq etməsi ilə əlaqədar DİN-in bir qrup əməkdaşı Gədəbəy rayonuna ezam olunub. Həmin fakt üzrə xidməti yoxlama aparılır.Xidməti yoxlamanın nəticəsindən asılı olaraq məsələyə hüquqi qiymət veriləcəkdir.

Baş verən bu hadisənin fonunda cəmiyyətin siyasi psixoloji durumunu siyasi psixoloq Samirə Qasımlı Kamran Mahmudovun təqdimatında yayımlanan “Çətin sual” verilişində izah edir.