Hakimiyyət Tofiq Yaqublunun və Bəxtiyar Hacıyevin tələblərini niyə yerinə yetirmir? Məqsəd nədir? – Zaur Əkbər Çətin sual qarşısında

Bakı/16.01.23/Turan: Yanvarın 15-də Tofiq Yaqublu quru aclığı dayandırıb, amma aclıq aksiyasını davam etdirir. Tofiq Yaqublu və Bəxtiyar Hacıyevin siyasi məhbuslara azadlıq tələbi ilə başladığı aclıq aksiyasına daha 4 nəfər qoşulub, 5 nəfər isə aclığı dayandırıb. Bir nəfər isə Tofiq Yaqubluya dəstək məqsədilə quru aclığa keçib.

7 gündür aclıq edən AXCP Salyan rayon şöbəsinin sədri Əlzamin Salayev yanvarın 15-dən quru aclığa başlayıb, su içməkdən imtina edib.

 Beləliklə, hazırda Tofiq Yaqublu, həyat yoldaşı Maya Yaqublu, Bəxtiyar Hacıyev də daxil olmaqla 20 fəal aclıq aksiyası keçirir.

Tibb elmləri doktoru Adil Qeybulla yanvarın 15-də Tofiq Yaqublunun qızı Nigar Həzi ilə birgə onunla görüşüb, müayinə edib. Onun sözlərinə görə, Yaqublu quru aclığı dayandırıb, su içib.

Bu arada ictimai fəal Bəxtiyar Hacıyevin təşkilatı, Müdafiə Xətti Hüquq müdafiə təşkilatı, Hüquqi Təşəbbüslər Mərkəzi qərarlaşdığı ofisdən çıxarılıb.

ABŞ Dövlət Departamenti Azərbaycanda son həbslərlə bağlı ciddi məşğul olduğunu bildirib. Bu barədə yanvarın 13-də Dövlət Departamentinin mətbuat katibinin müavini Vedant Patel danışıb.

Bütün bunlar barədə hüquq müdafiəçisi Zaur Əkbər Kamran Mahmudovun təqdimatında yayımlanan “Çətin sual” verilişində danışır.